Áburðarsalar rólegir
Samkvæmt svörum við fyrirspurnum sem sendar voru fyrirtækjum sem selja tilbúinn túnáburð og rúlluplast hafa allar pantanir borist til landsins og dreifing til bænda gengið vel.
Mikið hefur verið rætt um yfirvofandi verðhækkun eða skort á túnáburði vegna lokunar Hormússunds, en áhrifanna er ekki farið að gæta hérlendis. Í svörum kom fram að fyrirtækin sem selja þessar vörur á Íslandi hafi fengið rétt magn af áburði á þeim tíma sem um var samið. Fyrirspurnir voru sendar á Búvís, Sláturfélag Suðurlands, Lífland, Fóðurblönduna og Skeljung.
Erlendu birgjarnir þurftu að hækka verð á einstaka áburðategundum, en áburðarsalarnir hérlendis höfðu færi á að taka kostnaðaraukann á sig þannig að kjör bænda héldust óbreytt. Eins hafi kostnaður við flutning á landi og sjó hækkað, en fyrirtækin ákveðið að láta það ekki hafa áhrif á verð sem bændur höfðu samið um.
Áburðarverðskrár fyrirtækjanna komu flestar út í kringum áramót eða snemma í vor. Samkvæmt svörum þeirra hafa engar breytingar orðið á áburðarverði frá þeim tíma, en flest tala um að rúlluplast hafi ýmist hækkað eða fyrirséð sé að verð muni breytast þegar líður á sumarið. Birgðastaðan á óseldum áburði og rúlluplasti er samkvæmt fyrirtækjunum sambærileg og á sama tíma og síðastliðin vor.
Aðspurð um hvernig fyrirtækin meta horfurnar á heimsmarkaði miðað við samskipti þeirra við birgja erlendis eru þau öll sammála um að vegna stríðsátakanna við Hormússund sé verð á áburði og rúlluplasti í sögulegu hámarki. Dragist ástandið á langinn megi gera ráð fyrir að þessar vörur verði talsvert dýrari á næsta ári.
