67,5 milljónum úthlutað
Alls hlutu 25 verkefni styrki úr Þróunarfé búgreina upp á 67,5 milljónir króna. Flestir styrkir fóru til verkefna sem snéru að sauðfjárrækt en hæsti styrkurinn fór til verkefnis í garðyrkju.
Tíu verkefni í sauðfjárrækt hlutu samtals 20,2 milljónir króna, sex verkefni í nautgriparækt hlutu samtals 14,8 milljónir króna, eitt afsláttur verkefni í hrossarækt fékk styrk upp á 2,4 milljónir króna og eitt verkefni í garðyrkju hlaut styrk sem nam 30 milljónum króna. Þróunarfé búgreina er ætlað að styðja við kennslu, rannsóknir, leiðbeiningar og þróun í greinunum. Atvinnuvegaráðherra úthlutar styrknum og fagráð búgreina leggur faglegt mat á umsóknir en meðmæli þess eru forsenda styrkveitinga ráðuneytisins.
Verkefnin sem hlutu styrkveitingu voru fjölbreytt og sneru til að mynda að rannsóknum, fundarhöldum og fræðslu. Í nautgriparækt var það meðal annars verkefni sem sneri að fósturvísaflutningum í íslenskum kúm sem hlaut styrk. Verkefni um hámörkun á magni og gæðum uppskeru með notkun fjölrásafjarkönnunarmynda og verkefni um áhrif brennisteins, magnesíums og kalsíums í áburði á uppskeru og efnainnihald fóðurs fengu styrk í bæði nautgriparækt og sauðfjárrækt. Rannsókn á umhverfissmiti á riðubæ, afkvæmarannsóknir á hrútum og frumrannsókn á eðli og erfðum kollótta og gula litarins í sauðfé voru meðal þeirra verkefna sem fengu styrk í sauðfjárrækt. Í hrossarækt rann styrkurinn til verkefnis um afnæmingu hesta með sumarexem og í garðyrkju var það ráðgjöf erlendra garðyrkjuráðunauta.
Verkefnin voru á vegum Ráðgjafarmiðstöðvar landbúnaðarins, Búnaðarsambands Eyjafjarðar, Landbúnaðarháskóla Íslands, Bændasamtaka Íslands, Tilraunastöðvar Háskólans Keldna og Karólínu Elísabetardóttur, bónda og frumkvöðuls.
