48 lóðir verða seldar og hótel byggt
Skúli Kristófer Skúlason hjá fyrirtækinu Vinjar ehf., sem er einn af eigendum Galtalækjarskógar í Holta- og Landsveit í Rangárþingi ytra, hefur náð þeim mikilvæga áfanga að klára nýtt deiliskipulag fyrir skóginn en það hefur tekið á þriðja ár með tilheyrandi vinnu og kostnaði.
„Fyrir liggur samþykkt skipulag, sem gerir ráð fyrir allt að 48 undurfögrum lóðum inni í skóginum. Einnig er leyfi fyrir allt að 1.850 fermetra hóteli sem tengist 35–40 smáhýsum en við getum hugsað okkur að selja ferðaþjónustusvæðið sérstaklega með um 5 hekturum af landi í kringum hótelið ef þannig ber undir. Með því myndi gistiheimilið Langahlíð fylgja sem gæti þá orðið starfsmannaaðstaða,“ segir Skúli Kristófer.
Á vordögum á nýju ári munu hefjast framkvæmdir við vegagerð og veitur ásamt því að leggja stúta að öllum lóðum með köldu vatni og rafmagni. Um er að ræða fyrri hluta svæðisins en þar eru 28 lóðir en meiningin er að hefja sölu á lóðunum seinni hluta næsta sumars. „Lóðunum hefur verið skipt í þrjá flokka, það er að segja eftir staðsetningu, útsýni og stærð.
Þeir sem kaupa lóð í Galtalækjarskógi eru ekki einungis að kaupa um 5.000 fermetra lóð heldur fylgir með í kaupunum sameign með tugi hektara skógar með endalausum möguleikum til útivistar og aðstöðu til að njóta náttúrufegurðinnar eins og hún gerist best. Um er að ræða einstakt land í fallegum skógi sem erfitt er að finna á Íslandi í dag,“ segir Skúli.
