126 milljónum úthlutað til landbúnaðarverkefna
Alls hlutu 42 verkefni styrk úr Matvælasjóði 2026 upp á 479,4 milljónir króna. 131 umsókn barst til sjóðsins upp á rúmlega tvo milljarða.
Matvælasjóður styrkir þróun og nýsköpun við framleiðslu og vinnslu matvæla og hliðarafurða úr landbúnaðar- og sjávarafurðum. Áherslur sjóðsins eru á nýsköpun, sjálfbærni, verðmætasköpun og samkeppnishæfni íslenskra matvæla. Hæstu styrkirnir nema 30 milljónum króna og voru sex verkefni sem hlutu þá upphæð. Hæstu styrkina fengu Háskólinn á Akureyri, Lava Seaweed ehf., Hafrannsóknastofnun, Háskóli Íslands, Von harðfiskverkun ehf., og Akurós ehf.. Tvö verkefni fengu þar að auki tæplega þrjátíu milljónir, en verkefni á vegum Háskóla Íslands og verkefni á vegum Matís hlutu 29,9 milljónir hvort um sig.
Mest fór af styrkjum til verkefna í matvælaiðnaði, sem nam 231 milljón króna. Næstmest fór til landbúnaðarverkefna, upp á 126 milljónir króna. Þá fóru 63 milljónir í verkefni tengd sjávarútvegi, 51 milljón í fiskeldi og 8 milljónir í verkefni tengd hringrásarkerfum.
Styrkurinn skiptist í fjóra flokka: Bára er flokkur verkefna á hugmyndastigi, Kelda er fyrir rannsóknarverkefni sem skapa nýja þekkingu og grunn að verðmætasköpun framtíðar, Afurð snýr að mótun og þróun afurða sem komnar eru af hugmyndastigi en ekki tilbúnar til markaðssetningar og Fjársjóður er flokkur sem snýr að markaðssókn, markaðsinnviðum og útflutningi fullmótaðara afurða úr íslenskum hráefnum. Alls hlutu 22 verkefni styrk í flokki Báru, 8 verkefni í flokki Keldu, 9 verkefni í flokki Afurðar og 3 verkefni í flokki Fjársjóðs. 69% styrkja rann til landsbyggðarinnar og 31% til verkefna á höfuðborgarsvæðinu. Mest fór til Suðurlands á landsbyggðinni en 19% styrktra verkefna eru staðsett þar og næstmest til Norðurlands eystra en þar eru 16% styrkþega.
Á vef stjórnarráðsins segir Hanna Katrín Friðriksson atvinnuvegaráðherra: „Líkt og fram kom í úttekt sem Rannsóknamiðstöð Háskólans á Akureyri gerði þá hefur sjóðurinn skapað umtalsverðan ávinning fyrir íslenska matvælageirann. Sjóðurinn hefur því svo sannarlega sannað gildi sitt og er afar mikilvægur fyrir nýsköpun, og þar með verðmætasköpun, í íslenskri matvælaframleiðslu.“ Þetta er í sjöunda sinn sem úthlutað er úr sjóðnum.
