Ullarvika í fjórða sinn
Ullarvikan á Suðurlandi verður haldin hátíðleg dagana 27. september–3. október nú í ár. Þessi viðburður sem nú er haldinn í fjórða sinn fagnar íslensku sauðkindinni, ullinni og handverkinu. Hátíðin er að mestu skipulögð af sjálfboðaliðum á svæðinu, þar á meða Spunasystrum í Rangárvallasýslu og Þingborgarkonum í Árnessýslu.
Dagskráin teygir sig um allt Suðurland, frá Selfossi til Kirkjubæjarklausturs, og fer fram í félagsheimilum, handverksstofum og á sauðfjárbúum. Fjölbreyttir og opnir viðburðir eiga sér fastan sess á hátíðinni. Má þar nefna prjónamessu í Árbæjarkirkju, (Rang) sauðfjárlitasýningu í Árbæjarhjáleigu, verðlaunaafhending, rúningu, prjónakaffi og markaði. Jafnframt kenna innlendir og erlendir sérfræðingar á fjölmörgum námskeiðum þar sem farið er m.a. í prjón, vefnað, jurtalitun og þæfingu.
Meginmarkmið Ullarvikunnar er að auka virðingu fyrir íslenska lopa- og garnferlinu og sýna þá miklu vinnu og natni sem bændur leggja í ræktun og umhirðu fjárins. Allir þættir í lífi kindarinnar – svo sem fóður, heilsa, aldur og veðurfar – hafa afgerandi áhrif á gæði ullarinnar. Með því að leiða saman bændur, prjónafólk og almenning býður hátíðin upp á dýrmætt tækifæri fyrir fólk úr borgum og bæjum til að komast í návígi við sauðfé og kynnast fjölbreyttum eiginleikum ullarinnar.
Dagskrá ullarvikunnar má finna á www.ullarvikan.is.
