Rjómaís okkar sannarlega rjómaís, segir framkvæmdastjóri Emmessís

Í síðasta Bændablaði var fjallað um hertar fitur í ís, þar á meðal frá Emmessís.

Kristján Geir Gunnarsson, framkvæmdastjóri Emmessís, segir það viðtekna venju að nota smjör í rjómaísgerð og sé Emmessís ekki að gera öðruvísi þar en erlendir framleiðendur.

„Að sama skapi kjósa aðrir framleiðendur að nota rjóma en að flestra mati hefur það ekki áhrif á lokaútkomuna. Samkvæmt öllum reglugerðum og ísvenjum þá er rjómaísinn okkar svo sannarlega rjómaís.“

Kristján Geir gerir þá athugasemd við umfjöllunina í Bændablaðinu að vatn, smjör og sykur séu aðalinnihaldsefnin í Rjómaís frá Emmessís, ekki smjör og sykur, og leiðréttist það hér með. Beðist er velvirðingar á mistökunum.

Einnig leiðréttist að samkvæmt bandarískum reglugerðum um ísgerð þarf ís að innihalda 6-10% mjólkurþurrefni, ekki mjólkurprótein.

Vert er að bæta við að íslenska reglugerðin um ís er ekki ólík þeirri bandarísku. Í íslensku reglugerðinni segir: „Í þeim (Mjólkurís og rjómaís) skulu próteinin og fitan eingöngu vera úr mjólk en bæta má í vöruna öðrum hráefnum, aukefnum og bragðefnum.“ Emmessís má samkvæmt henni kalla ís sinn rjómaís en ekki var um það fjallað í greininni.