Raforkukostnaður lækkar í dreifbýli

Jöfnun kostnaðar við dreifingu raforku milli dreifbýlis og þéttbýlis eykst úr rúmum 60% í tæplega 90% með nýjum lögum sem tóku gildi þann 1. júlí og ættu áhrifin að birtast strax í rafmagnsreikningum sem berast heimilum og fyrirtækjum í upphafi næsta mánaðar.

Frumvarp umhverfis-, orku- og loftslagsráðherra um breytingar á lögum um Jöfnun kostnaðar við dreifingu raforku milli dreifbýlis og þéttbýlis er liður í stefnu ríkisstjórnarinnar um að jafna aðstöðu heimila og fyrirtækja óháð búsetu og styrkja stoðir atvinnulífs og búsetu í dreifðum byggðum. Áhrifin munu koma einna sterkast fram í landbúnaði. Þetta kemur fram í fréttatilkynningu frá umhverfis, orku og loftslagsráðuneytinu.

„Um leið og dreifbýlisframlag hækkar og raforkureikningurinn lækkar hjá heimilum og fyrirtækjum í dreifbýli fela breytingarnar í sér að raforkunotkun vegna hitunar íbúðarhúsnæðis sem uppfyllir skilyrði niðurgreiðslna skv. 4. gr. laga um niðurgreiðslur húshitunarkostnaðar, nr. 78/2002, verður undanþegin greiðslu jöfnunargjalds. Þetta þýðir að raforkureikningur allra heimila sem reiða sig á rafhitun eða kyntar veitur mun einnig lækka lítillega,“ segir í tilkynningunni.

Haft er eftir Jóhanni Páli Jóhannssyni, umhverfis-, orku- og loftslagsráðherra, í fréttatilkynningunni að þetta sé jafnaðarmennska í orkumálum og mikilvægt byggðamál. „Fyrir landbúnað og ýmsa atvinnustarfsemi í dreifðum byggðum skiptir þetta gríðarlegu máli. Fyrir t.a.m. meðalstórt kúabú gæti lækkunin á dreifikostnaði raforku sem lagabreytingarnar skila numið rúmlega 40.000 kr. á mánuði, eða um 480.000 kr. á ári. Fyrir mörg bú er það fjárhæð sem skiptir máli á tímum þar sem aðföng, vextir og annar rekstrarkostnaður hafa hækkað mikið. Raforkueftirlitið mun fylgjast grannt með því að jöfnunin skili sér til notenda og við munum halda áfram að þróa jöfnunarkerfið þannig að það skili þeim árangri sem að er stefnt.“