Óttast að Kristnesspítala verði lokað
Um 280 konur í Kvennasambandi Eyjafjarðar óttast mjög að Kristnesspítala í Eyjafirði verði lokað vegna lélegs ástands spítalans og mikils skorts á viðhaldi.
Kristnesspítali var stofnaður árið 1927 en spítalinn var byggður í þeim tilgangi að einangra og meðhöndla berklasjúklinga en hlutverk hans hefur breyst mikið í gegnum árin. Á aðalfundi Kvennasambands Eyjafjarðar, sem var nýlega haldinn á Ólafsfirði, var samþykkt sérstök ályktun um Kristnesspítala.
„Ástæðan er fyrst og fremst sú að það er verulegt áhyggjuefni hjá okkur ef starfsemin leggst niður, ekki bara sem vinnustaður heldur sem mikilvægur hlekkur í heilbrigðisþjónustu utan höfuðborgarsvæðisins,“ segir Birgit Schov, formaður sambandsins, og bætir við: „Það var 100 prósent samstaða um ályktunina á fundinum enda höfum við og samfélagið allt miklar áhyggjur af stöðunni á Kristnesi.“
Í ályktuninni segir m.a. orðrétt: „Endurhæfingardeildin á Kristnesspítala gegnir lykilhlutverki í heilbrigðisþjónustu fyrir íbúa Norðurlands og víðar. Þar fer fram mikilvæg þjónusta við einstaklinga sem þurfa á sérhæfðri endurhæfingu að halda eftir veikindi, slys eða skurðaðgerðir. Núverandi ástand húsnæðis og skortur á viðhaldi ógna þessari starfsemi með alvarlegum hætti. Sambandið telur brýnt að gripið verði tafarlaust til aðgerða til að tryggja öruggt og viðunandi umhverfi fyrir sjúklinga og starfsfólk.“
