Nýtt myndband um burðarhjálp

Nýtt myndband hefur verið sett inn á YouTube-rásina Leiðbeiningar um burðarhjálp, þar sem bændum er leiðbeint um sérstaka aðferð í burðarhjálp sem hentar vel þegar hausinn kemst ekki í gegnum grindina ef fæturnir fylgja með, eins og í venjulegum burði.

Ástæða fyrir erfiðleikum í burði geta verið vegna stórra horna á lambi, stórs hauss eða að lambið sé sérstaklega stórt. Í nýja myndbandinu fá bændur leiðbeiningar í burðarhjálp þar sem bönd eru fest á framfætur lambsins, þeir settir inn aftur og höfuð sótt á undan fótum. Síðan eru fæturnir sóttir hvor á eftir öðrum með hjálp bandanna. Hálsinn er talsvert mjórri en hausinn og því meira pláss í fæðingarvegi kindarinnar.

Í tilkynningu með myndbandinu frá Karólínu og Axel, umsjónarmanna Youtube-rásarinnar, segir að aðferðin krefjist sérstakrar varúðar, því böndin megi alls ekki hrökkva fram og einnig þurfi að gæta vel að því að fæturnir skaðist ekki eða að þeir skaddi leghálsinn.

Rásin verið starfrækt síðan 2019

Umsjón með rásinni er í höndum Karólínu Elísbetardóttur, sauðfjárbónda Hvammshlíð, og Axels Kárasonar, dýralæknis í Sólheimum. Þau settu YouTube-rásina í loftið í kringum 2019 og þar má nú nálgast 24 ítarleg leiðbeiningarmyndbönd í kringum burðarhjálp og sauðburð. Bændur um allt land hafa sent myndefni í gegnum árin, auk þeirra myndbanda sem Karólína tók á mismunandi bæjum í Skagafirði og Austur-Húnavatnssýslum. Það má því segja að rásin sé stórt samvinnuverkefni bænda. 

Myndböndin eru öllum opin á YouTube og jafnframt aðgengileg á ensku og þýsku til að auðvelda erlendu aðstoðarfólki vinnuna.