Nýr mælikvarði á líftölu

Í haust stendur til að kynna fyrir kúabændum nýjan mælikvarða á líftölu sem gefur upplýsingar um magn baktería í mjólk.

Rannsóknarstofa mjólkuriðnaðarins (RM) tók árið 2023 nýtt mælingartæki sem notar IBC bakteríueiningar, sem er sambærilegt því sem gerist annars staðar á Norðurlöndunum. Nýja mælingar- tækið nær að telja fleiri bakteríur en gamla tækið og sýnir hærri niðurstöður en eldri búnaður. Frá þessu greinir Auðhumla í fréttatilkynningu.

RM hefur umreiknað niðurstöður eldra tækisins til þess að það falli að núgildandi reglum um flokkun og verðfellingar vegna líftölu í mjólk. Unnið er að endurskoðun á þessum reglum og mun RM hætta umreikningi þegar þær taka gildi. Til þess að venja bændur við væntanlegar breytingar hefur verið settur í loftið hluti af nýjum bændavef Auðhumlu. Þar geta bændur bæði séð gildi líftölunnar samkvæmt núverandi mælikvarða sem og verðandi gildi líftölunnar samkvæmt nýja mælikvarðanum. Eldri mælikvarðinn er línulegur á meðan sá nýi er í veldisfalli. Samanburður milli kvarða er því erfiður, en í fréttatilkynningu er tekið sem dæmi að 20 á núverandi mælikvarða, sem er hámarksgildi fyrir úrvalsmjólk, er sambærilegt 65 á nýjum mælikvarða. Þá verður líftalan 80 á núverandi mælikvarða, sem er hámarksgildi fyrir fyrsta flokks mjólk, talan 383 á nýjum mælikvarða.

Með því að smella á „Bændavefur“ á heimasíðu Auðhumlu opnast flettigluggi þar sem bændum gefst kostur á að velja á milli „Bondi“ og „Bondi 2 – BETA“. Síðarnefndi valkosturinn leiðir notendur á nýja vefinn og er hægt að skrá sig inn með sama notandanafni og lykilorði og áður.

Auðhumla er samvinnufélag kúabænda sem sér um að taka við mjólk frá félagsmönnum. Starfssvæði Auðhumlu er allt landið nema Skagafjörður. Saman eiga Auðhumla og Kaupfélag Skagafjarðar Mjólkursamsöluna ehf.