NABU Climate Fund styrkir endurheimt votlendis
Landbúnaðarháskóli Íslands (LBhÍ) og NABU Climate Fund hafa undirritað samstarfssamning um stuðning við endurheimt framræsts votlendis á Hvanneyri og í nágrenni þess. Samningurinn gildir til ársins 2031.
Með samningnum skuldbindur NABU Climate Fund sig til að leggja fram fjármagn til endurheimtar nokkurra framræstra votlendissvæða á láglendi við Hvanneyri. Auk þess munu votlendissérfræðingar NABU, sem teljast meðal fremstu sérfræðinga Evrópu á þessu sviði, veita stuðning við rannsóknir og mælingar innan Mýralífsverkefnisins (PEATLAND LIFEline) á Íslandi. Undirritun samningsins fór fram í vikunni, af Ingo Ammermann, framkvæmdastjóra NABU Climate Fund, og Ragnheiði Þórarinsdóttur, rektor Landbúnaðarháskóla Íslands.
Í fréttatilkynningu frá skólanum kemur fram að votlendi gegni lykilhlutverki í loftslagsmálum og vernd líffræðilegrar fjölbreytni sé mikilvæg. „Framræst votlendi losar gróðurhúsalofttegundir, en með endurheimt þess má draga úr losun, bæta vistkerfi og efla búsvæði fjölmargra tegunda. Vernd og endurheimt þessara einstöku vistkerfa er því mikilvæg aðgerð í baráttunni gegn loftslagsbreytingum og hnignun náttúrunnar.“
Landbúnaðarháskóli Íslands fagnar samstarfinu og lítur á samninginn sem mikilvægt skref í áfram- haldandi uppbyggingu þekkingar, rannsókna og framkvæmdaverkefna á sviði endurheimtar votlendis á Íslandi.
