Mikill áhugi á garðyrkjunámi
Garðyrkjuskólinn á Reykjum, sem nú heyrir undir Fjölbrautaskóla Suðurlands, tekur inn nýnema annað hvert ár og nú í haust mættu um 120 nemendur til leiks í garðyrkjunámið.
Um helmingur þeirra eru nýnemar og um helmingur eru fjarnemar sem eru að taka seinni hluta náms síns en nemendur í fjarnámi taka námið á hálfum hraða.
Almennt tekur námið tvo vetur, eða fjórar annir, en fjarnemar eru að jafnaði í skólanum í átta annir. „Vinsældir garðyrkjunámsins hafa verið stöðugar undanfarin ár og er þetta álíka stór hópur og hefur komið í námið síðustu ár. Að þessu sinni eru fjórar brautir kenndar; garð- og skógarplöntuframleiðsla, ylrækt, lífræn ræktun matjurta og skrúðgarðyrkja sem er löggilt iðngrein. Námsbraut skógar og náttúru og blómaskreytingabraut eru ekki kenndar að þessu sinni. Allar brautir eru einnig í boði í fjarnámi enda er Garðyrkjuskólinn eini skólinn í landinu sem býður upp á garðyrkjunám,“ segir Guðríður Helgadóttir, staðarhaldari á Reykjum.
Hún segir að fjarnemar þurfi þó að mæta í skólann í verklegar æfingar þrisvar sinnum á hverri önn og oftar þegar lengra dregur í náminu, enda eru garðyrkjugreinar verklegar greinar og mikilvægt að kenna nemendum einnig til verka.
Svipuð dreifing á brautir
„Dreifing nemenda á brautir er nokkuð jöfn, það eru um 35 nemendur á garð- og skógarplöntubraut og skrúðgarðyrkjubraut hvorri um sig, um 30 á lífrænu brautinni og um 20 á ylræktarbraut. Í gegnum tíðina hefur skrúðgarðyrkjubrautin verið vinsæl enda er það eina greinin innan garðyrkjunnar sem er löggilt iðngrein, en vissulega sveiflast vinsældir brauta yfirleitt í takt við tíðarandann í samfélaginu,“ segir Guðríður.
30 til 40 ára meðalaldur
Þegar Guðríður er spurð út í meðalaldur nemenda segir hún að hann sé einhvers staðar á milli 30 og 40 ár en nemendahópurinn sé á öllum aldri, frá tæplega tvítugu og upp úr. Konur eru um tveir þriðju hlutar nemenda en karlar eru þó í meirihluta á skrúðgarðyrkjubrautinni. Nemendur skólans koma af öllu landinu og eru með ákaflega fjölbreyttan bakgrunn, allt frá fólki með nokkrar háskólagráður yfir í fólk sem hefur ekki lokið mikilli formlegri menntun, en allir nemendur eiga það sameiginlegt að brenna af áhuga á garðyrkju. „Skólastarfið fer mjög vel af stað, kennsla hófst mánudaginn 24. ágúst síðastliðinn á verklegri viku. Þá mættu allir nemendur á staðinn og líf og fjör alls staðar á skólalóðinni, inni í gróðurhúsum, úti í skógi og allt um kring. Það er óhætt að segja að veturinn leggist mjög vel í starfsfólk og nemendur, enda fátt skemmtilegra en að hitta fólk sem deilir sama áhugasviði,“ segir Guðríður kát og hress. Þá má geta þess að endurmenntun Græna geirans heldur fjölbreytt námskeið á fagsviðum skólans og byggir á áratuga reynslu. Hægt er að finna upplýsingar um námskeið á hlekknum www.fsu.is/ is/namid/gardyrkjuskolinn-reykjum/ gardyrkjuskolinn-namskeid.
