Mikil aðsókn nýnema
Rétt rúmlega fimmtíu nýstúdentar útskrifuðust úr Menntaskólanum að Laugarvatni laugardaginn 23. maí við hátíðlega athöfn í sal skólans. Mikil aðsókn er að skólanum í haust því um 54 nýnemar verða teknir inn.
Fyrir eru tveir bekkir fullir, einn bekkur á náttúruvísindabraut og einn bekkur á félags- og hugvísindabraut.
„Heildarfjöldi nemenda verður rúmlega 150. Heimavistin verður stútfull og nánast hver einasti nemandi verður á vistinni eins og staðan er núna,“ segir Jóna Katrín Onnoy Hilmarsdóttir skólameistari.
Tveir nemendur urðu dúxar við skólann við brautskráninguna, þau Eva Rut Jóhannsdóttir frá Hveragerði og Óskar Ingi Eyþórsson frá Selfossi en þau voru bæði með einkunnina 8,75. Semidúx varð Hrefna Erla Hannesdóttir frá Kópavogi með einkunnina 8,63.
