Keldnakirkja afhent Þjóðminjasafninu
Keldnakirkja á Rangárvöllum hefur formlega verið afhent Þjóð minjasafni Íslands til varðveislu.
Safnið tók við gamla bænum árið 1946 og síðan hafa verið afhentar fornminjar og ríkinu voru seldir 129 hektarar af landi, ásamt því að kaupa íbúðarhús og útihús á Keldum.
„Við héldum eftir okkar íbúðarhúsi og eigum um 6 þúsund hektara lands, þar sem við erum með skógrækt og landgræðslu. Mér finnst þetta góð ráðstöfun með húsin, landið og kirkjuna þar sem ég átti hugmyndina að þessum gjörningi,“ segir Drífa Hjartardóttir, sem býr á Keldum með sínu fólki.
„Ég á þá ósk að þessum eignum verði vel við haldið, þær eru einar merkustu fornminjar sem við eigum og Keldur er merkur sögustaður. Fjölskylda Skúla, eiginmanns míns, hefur búið á Keldum frá því á átjándu öld. Það er einstakt að búa á Keldum í þessu sögulega umhverfi, fallegt bæjarstæði og fjallasýnin er alveg einstök. Það eru ekki allir með Heklu í bakgarðinum eins og ég,“ segir Drífa stolt og ánægð.
