Kalla eftir úttekt á stöðu greinarinnar

Á deildarfundi svínabænda á dögunum var samþykkt ályktun þar sem lýst er þungum áhyggjum af starfsumhverfi greinarinnar.

Skorað er á atvinnuvegaráðherra að skipa starfshóp til að skila skýrslu um stöðu greinarinnar og koma með tillögur til úrbóta. Í greinargerð með ályktuninni segir að eftirspurn eftir svínakjöti hafi aukist jafnt og þétt á síðustu árum. Á sama tíma hafi innlend framleiðsla staðið í stað og aukinni eftirspurn því verið mætt með innflutningi. Mikilvægt sé að fá greiningu á því hvað valdi þessari þróun.

Þróun tollverndar og markaðshlutdeild

Skoða þurfi nokkur atriði í því samhengi, til að mynda þróun tollverndar og markaðshlutdeild innlendrar framleiðslu í samanburði við innflutning síðustu tíu árin. Kortleggja þurfi rekstrarumhverfi greinarinnar og gera samanburð á ýmsum rekstrarþáttum greinarinnar á Íslandi miðað við aðstæður í innflutningslöndum, eins og í Danmörku, Þýskalandi og Litáen. Auk þess verði starfshópnum sérstaklega falið að skoða kröfur sem snúa að dýravelferð, þá er meðal annars verið að vísa í atriði eins og lausagöngu gyltna og geldingar, kröfur um fjarlægðarmörk svínabúa frá mannabústöðum, sýklalyfjanotkun og fjárfestingastuðning.

Þá skuli starfshópurinn skoða úrgangsmálin og þær kröfur sem gerðar eru til greinarinnar í samanburði við annan rekstur á Íslandi.

Lagt er til að í starfshópnum sitji einn fulltrúi frá atvinnuvegaráðuneytinu, einn frá Matvælastofnun og einn frá Bændasamtökum Íslands.

Óbreytt stjórn

Stjórn svínadeildar Bændasamtaka Íslands verður óbreytt eftir deildarfundinn; Ingvi Stefánsson, Teigi verður áfram formaður, Geir Gunnar Geirsson frá Stjörnugrís varaformaður og Sveinn Jónsson frá Matfugli ritari. Í varastjórn verða þau Björgvin Þór Harðarson og Petrína Þórunn Jónsdóttir, Laxárdal og Andrés Kristinsson, Hraukbæ.

Ingvi Stefánsson og Björgvin Þór Harðarson voru kjörnir búnaðarþingsfulltrúar.

Ingvi segir að þessi atriði sem birtast í ályktuninni frá deildarfundinum séu mál sem brenni á svínabændum. „Við höfum lengi barist fyrir því að fá skipaðan starfshóp til að fara yfir starfsumhverfi greinarinnar og að gerður yrði þessi samanburður við rekstrar- og aðbúnaðaraðstæður í þeim löndum sem við keppum við.

Við teljum að það sé betra að koma þessum atriðum bara fyrir í einni ályktun heldur en að dreifa þeim á mörg mál,“ segir Ingvi.