Hertar reglur um blý í skotfærum

Frestur til að gera athugasemdir við herta löggjöf Evrópusambandsins um blý í skotfærum er liðinn og hún tekur því senn gildi. Löggjöfin tók talsverðum breytingum í umsagnarferli.

Lykilbreytingar sem gerðar voru eru að aðlögunartími er lengdur í sjö ár og bannið tekur aðeins til blýhagla. Ástæður hertrar löggjafar eru af náttúru- og dýraverndarástæðum en staða varnarmála hefur áhrif á breytingar frá upphaflegri tillögu.

Blýhögl bönnuð

Löggjöfin tekur gildi 20 dögum eftir birtingu í Stjórnartíðindum Evrópusambandsins, en lokameðferð í Evrópuþinginu lauk 8. október. Hún hefur enn ekki verið birt.

Helstu breytingar sem gerðar voru eftir að hún var fyrst lögð fram eru að aðlögunartími var lengdur úr þremur árum í sjö fyrir notkun blýhagla, sem verða bönnuð. Að þeim tíma loknum verður óheimilt að selja haglaskot sem innihalda 1% eða meira af blýi til veiða. Blýkúlur í riffilskot eru ekki hluti nýrra laga eins og í upphaflegri tillögu.

Bann við notkun blýhagla í og við votlendi hefur verið í gildi frá árinu 2023. Nýja löggjöfin tekur til almenns banns við notkun þeirra og leysir eldri löggjöfina því af hólmi.

Staða varnarmála hefur áhrif

Hvatinn að lagabreytingunum kemur frá Evrópsku efnastofnuninni (ECHA) sem Ísland er aðili að.

Ekki verður af banni við blýkúlum í riffilskot, sem notuð eru til veiða á stærri bráð, eins og upphaflega var ritað um í drögum að nýrri löggjöf. Framkvæmdastjórn Evrópusambandsins færir þau rök fyrir breytingunni að nauðsyn sé að viðhalda framleiðslu- og birgðagetu á grundvelli breytinga í öryggis- og varnarmálum Evrópu.

Meðlimir Evrópusamtaka skotveiðifélaga (FACE) tóku virkan þátt í umsagnarferli lagasetningarinnar. Skotveiðifélag Íslands (SKOTVÍS) á aðild að samtökunum.