Fundað um líffræðilega fjölbreytni
Til umræðu var aðgerðaáætlun Íslands um líffræðilega fjölbreytni og samþættingu málaflokka tengdum umhverfismálum.
Í tilkynningu á vef stjórnarráðsins segir að Schomaker hafi lagt áherslu á mikilvægi þess að brjóta niður veggi í stjórnsýslu umhverfismála. Ákvarðanir á einu sviði geti haft bein áhrif á önnur svið og því skipti máli að loftslagsmál, líffræðileg fjölbreytni, umhverfis- og orkumál séu unnin í samhengi. Hún lýsti yfir ánægju með að þessir málaflokkar væru sameinaðir á Íslandi. Jóhann Páll sagði tækifæri til að tengja enn betur saman aðgerðir í loftslagsmálum og vernd líffræðilegrar fjölbreytni.
„Við leggjum áherslu á loftslags- og umhverfisverndaraðgerðir með margþættan ávinning. Þessa dagana erum við að leggja lokahönd á aðgerðaráætlun um líffræðilega fjölbreytni, til að fylgja eftir stefnu stjórnvalda um líffræðilega fjölbreytni sem við samþykktum fyrr á þessu ári. Sú aðgerðaráætlun verður nátengd forgangsverkefnum okkar í loftslagsmálum og mun spila vel saman við aðra stefnumörkun. Heilbrigð vistkerfi skipta máli fyrir loftslag, fæðuöryggi, vatnsbúskap, kolefnisbindingu og lífsgæði um allt land.” sagði Jóhann Páll Jóhannsson, umhverfis-, orku og loftslagsráðherra.
Jafnframt ræddu Jóhann Páll og Astrid um mikilvægi hafverndar til að tryggja líffræðilega fjölbreytni í hafi og þau ræddu nýlega samþykkt lög um vernd líffræðilegrar fjölbreytni á úthafi til innleiðingar á samningi Sameinuðu þjóðanna um líffræðilega fjölbreytni á úthöfum (Biodiversity Beyond National Jurisdiction).
Aðgerðaáætlun Íslands um líffræðilega fjölbreytni var birt í desember 2025. Meginstef stefnunnar snýr að því að málefni líffræðilegrar fjölbreytni fái meira vægi í opinberri stefnumótun, áætlanagerð og ákvarðanatöku á öllum stjórnsýslustigum. Í áætluninni var sett markmið um að 30% raskaðra vistkerfa á landi, í ferskvatn, til stranda og sjávar verði í virkri endurheimt árið 2030. Jafnframt er fjallað um mikilvægi þess að bregðast vð framandi ágengum tegundum og setja skýra lagalega og stjórnsýslulega umgjörð um málaflokkinn.
