Frestar verðhækkunum til að stuðla að lækkun verðbólgu

Sláturfélag Suðurlands frestar verðhækkunum haustsins til þess að koma til móts við óskir Verslunarmannafélags Reykjavíkur (VR), Landssambands íslenskra verzlunarmanna og Rafiðnaðarsambandsins um að leggja sitt af mörkum til þess að ekki kæmi til uppsagnar kjarasamninga.

„SS hefur fjallað um þessa beiðni og telur rétt, sem ábyrgur aðili, að taka tillit til þessara óska vegna þess sem er í húfi,“ segir í fréttatilkynningu frá félaginu. „Verðhækkun allra vara í smásölu undir vörumerkjum SS, 1944 og Búrfell sem áttu að hækka um 3% hefur verið frestað fram í janúar. Nokkrir vöruliðir í smásölu sem áttu að hækka um 5% munu hækka um 3%.“

Kostnaður SS við að fresta eða breyta nefndum verðbreytingum er áætlaður 90-110 mkr. Steinþór Skúlason, forstjóri SS, segir að frestun hækkana muni ekki hafa áhrif á verð til bænda en félagið er að fullu í eigu bænda.

Verðhækkanir haustsins voru ætlaðar til að mæta hluta þeirra kostnaðarhækkana sem orðið hafa á árinu. „Frá áramótum þá hafa plastumbúðir hækkað um 16-30%, flutningskostnaður aukist um 15%, önnur rekstrarvara hækkað um 5-15% og laun hækkað um 5,3%. Áætluð hækkun til bænda er 3-4%. Til að mæta hluta þessa kostnaðarauka ætlaði SS að hækka verð um 3-5% á næstu dögum,“ segir í tilkynningunni.