Framlög til Loftslags- og orkusjóðs lækka um 3,2 milljarða
Framlög til Loftslags- og orkusjóðs verða skert um 3,2 milljarða króna á næsta ári samkvæmt fjárlagafrumvarpi 2027.
Í greinargerð umhverfis-, orku- og loftslagsráðuneytisins um orkumál fjárlagafrumvarpsins kemur fram að lækkunin skiptist annars vegar í 1,2 milljarða króna sértæka aðhaldsráðstöfun, sem gert hafði verið ráð fyrir í fjármálaáætlun, og hins vegar tveggja milljarða króna óskipta aðhaldsráðstöfun á málefnasviði orkumála, sem lögð er á sjóðinn í heild sinni. Samkvæmt núgildandi fjármálaáætlun á útgjaldaheimild sjóðsins síðan að hækka um einn milljarð króna árið 2028.
Hefur stutt verkefni í landbúnaði
Loftslags- og orkusjóður hefur meðal annars fjármagnað orkuskipti í samgöngum og verkefni í landbúnaði.
Í tveimur úthlutunum var alls 236 milljónum króna ráðstafað úr sjóðnum til orkusparandi aðgerða í gróðurhúsum sem bændur nýttu sér meðal annars til fjárfestinga í LED-lýsingu. Alls var úthlutað til 21 verkefnis garðyrkjubænda sem áætlað er að geti náð fram um 17,8 gígavattstunda árlegum raforkusparnaði.
Markmið um að draga úr áburðarnotkun Síðasta vor úthlutaði sjóðurinn samtals 80 milljónum króna til 42 verkefna til loftslagsvænna tæknilausna í landbúnaði, sem hafa meðal annars snúist um að draga úr áburðarnotkun á tilbúnum áburði með nákvæmari og markvissari vinnubrögðum.
Meðal verkefna í þeirri úthlutun voru kaup á GPS-stýrðum áburðardreifurum, bætt tækni fyrir lífrænan áburð og kaup á ýmsum tækjakosti. Áætlað var að samdráttur í losun vegna þessara loftslagsaðgerða myndi verða 1.007 tonn af koltvísýringsígildum á ári. Talið var að ávinningurinn yrði fjölþættur, rekstrarsparnaður í búrekstri, betri meðferð á takmörkuðum auðlindum og minni vistkerfisröskun.
