Eimverk eykur starfsemi í Bjálmholti
Fyrirtækið Eimverk framleiðir viskí og er stórtækt í ræktun og kaupum á korni. Starfsemi Eimverks hefur verið bæði í Garðabæ og í Bjálmholti í Holtum en mun nú færast alfarið á síðarnefnda staðinn.
„Núna hefur verið tekin sú ákvörðun að byggja nýtt 2.000 fermetra eimingarhús í Bjálmholti sem fjórfaldar framleiðslugetu okkar á viskíi í fyrsta áfanga,“ segir Haraldur Haukur Þorkelsson, framkvæmdastjóri Eimverks, í samtali. „Hingað til höfum við verið með starfsemi á tveimur stöðum, það er í Bjálmholti í Holtum þar sem við erum með kornrækt og tunnugeymslu á viskíinu, á meðan eimingarhúsið okkar hefur verið í Garðabæ.
Þarna verður jafnframt fyrsta möltunarverksmiðja Íslands, en þar verður hægt að malta um 400 tonn af korni á ári. Hingað til hefur þetta ekki verið gert með íslenskt bygg af neinum skala hérna á Íslandi og höfum við maltað í höndunum. Með því að malta byggið er það látið spíra aðeins og með því losnar um ensím sem hjálpa til með að brjóta niður sykurinn. Þetta opnar á þann möguleika að aðrir geti keypt af okkur maltað korn, ýmist til að framleiða viskí eða bjór. Ef áætlanir ganga eftir verða möltunarverksmiðjan og eimingarhúsið komin í notkun á næsta ári,“ segir Haraldur.
Ætla að verða stærsti kaupandi íslensks byggs
„Hvað byggræktina varðar höfum við sjálfir ræktað um 100 tonn á ári,“ segir Haraldur. „Eftir því sem þörfin eykst stefnum við að því að auka samvinnu við bændur hér og þar um landið. Núorðið er minnst af korninu sem við notum ræktað í Bjálmholti, en við höfum fengið aðgengi að ökrum í Gunnarsholti á Rangárvöllum. Við erum alltaf með einn eða tvo akra í gangi í Bjálmholti, ekki síst til þess að sýna gestum. Þar erum við yfirleitt með um fjóra til fimm hektara á meðan í Gunnarsholti eru akrarnir í kringum 40 hektarar.
Við notum bara íslenskt bygg og í vetur samþykkti MAST verndun vöruheitis fyrir íslenskt viskí og þarf það að innihalda að minnsta kosti til helminga íslenskt korn. Við ætlum ekki að verða stærsti aðilinn í byggrækt á Íslandi, en gangi okkar plön eftir verðum við hins vegar stærsti kaupandi íslensks byggs. Árið 2035 ætlum við að vera komnir upp í milljón flöskur, sem krefst þúsund tonna af byggi, sem er nálægt tíu prósentum af heildarbyggframleiðslu landsins eins og hún var í fyrra.
Bragðmunur getur verið á viskíi eftir því hvers konar bygg er notað og hvaðan það er, ásamt því sem árferði getur haft áhrif. Tæknilega séð færðu meira bragð eftir því sem verr gengur í kornræktinni. Oft er talað um að þau lönd sem eru norðarlega geti verið góð í kornrækt fyrir viskí, en ekki fyrir bjór. Þegar skosku brugghúsin þurfa að kaupa bygg að utan leita þau til Finnlands eða Svíþjóðar í staðinn fyrir einhver lönd sunnar,“ segir Haraldur.
Áburði dreift með dróna
„Við fengum styrk frá Orkusjóði til þess að kaupa stóran burðardróna til þess að dreifa áburði,“ segir Haraldur. „Hann er með hundrað kílóa áburðarsíló og getum við notað hann í staðinn fyrir að fara með traktor út á akur í aukaáburðargjöf með tilheyrandi raski og olíunotkun. Hann er ekki nema fimm til sjö mínútur að dreifa hundrað kílóum með nákvæmni á allan akurinn og eftir það kemur hann til baka til að sækja annan skammt og nýtt batterí. Við náum því að dreifa um sex til sjö hundruð kílóum á klukkustund sem fer á fimm til tíu hektara.
Þetta býður upp á annað vinnulag, en með þessu er hægt að dreifa sama magni af áburði í minni skömmtum í staðinn fyrir að gefa áburð bara fyrst samhliða sáningu og aftur einu sinni yfir sumarið. Þannig náum við að tryggja að plantan hafi á hverjum tíma passlegt magn af næringarefnum.
Þegar kemur að afköstum þá er traktorinn auðvitað með vinninginn ef til stendur að dreifa miklu magni á skömmum tíma. Dróninn er hins vegar með betri afköst þegar kemur að því að dreifa litlu magni oft, en það er eiginlega ekki gerlegt á dráttarvél út af því raski sem það veldur. Dróninn leysir auðvitað ekki öll mál þegar kemur að áburðargjöf, en þetta er skemmtileg nýjung,“ segir Haraldur.
