Brennsluofn fyrir dýrahræ
Í Árnesi í Skeiða- og Gnúpverja- hreppi hefur verið settur upp brennsluofn fyrir dýrahræ, sem er sá fyrsti á landsvísu sem rekinn verður af sveitarfélagi á Íslandi sérstaklega til að þjónusta bændur fyrir þessa sérhæfðu brennslu.
Ofninn er viðbragð sveitar- félagsins við þeim stóraukna kostnaði bænda sem lagst hefur á þá eftir að hætt var að þjónusta þá með urðun á dýrahræjum, en í staðinn byrjað að keyra úrganginn í brennslustöðina Kölku á Reykjanesi.
Haraldur Þór Jónsson, oddviti sveitarfélagsins, segir að stefnt sé að því að kostnaður bænda við þjónustuna verði lægri en var í fyrra urðunarkerfi. Þar hafi förgunin kostað um 60–70 krónur á kílóið. Verðskráin muni endurspegla kostnað við kaup og rekstur á ofninum.
Hann segir stjórnvöld hafa lengi verið með áform um að koma upp söfnunarkerfi fyrir þennan úrgang svo mögulegt sé að hætta að farga honum ólöglega með urðun. Í nýjustu tillögum þeirra sé gert ráð fyrir að hann verði allur fluttur í Kölku á Reykjanesi, sem hann telur óhagkvæmt fyrirkomulag. Hann bætir við að leysa mætti úrgangsvandann með uppsetningu á 15–20 ofnum hringinn í kringum landið.
