Baldursheimur 2 ræktunarbú ársins

Á Fagfundi sauðfjárræktarinnar á dögunum var Baldursheimur 3 í Mývatnssveit útnefnt ræktunarbú ársins 2025.

Þetta er í fimmta sinn sem ræktunarbú ársins er útnefnt á hinum árlega Fagfundi og hljóta ábúendurnir í Baldursheimi 2, þau Eyþór Pétursson og Agnes Einarsdóttir, því verðlaunagripinn Halldórsskjöldinn til varðveislu næsta árið.

Hæsta einkunnin fyrir gerð

Valið grundvallast á heildareinkunn kynbótamats, en reiknuð er meðaleinkunn fyrir hvert bú sem byggir á ám fæddum 2015 til 2024. Til þess að búið komi til álita þarf það að uppfylla ýmsar kröfur um afurðir í takt við núgildandi ræktunarmarkmið og komast inn á lista yfir „úrvalsbú“ sem birtur er árlega á vef Ráðgjafarmiðstöðvar landbúnaðarins.

Í umfjöllun Eyþórs Einarssonar um búið kom fram að heildareinkunn kynbótamats þess hefði verið 108,2 stig. Í kjölfar þess að EUROPkjötmatskerfið var tekið upp hér á landi hafi féð í Baldursheimi vakið mikla athygli fyrir góða gerð sláturlamba og ekki síst fyrir þær sakir að þessi lömb náðu mikilli holdfyllingu við minni þunga en sást í flestum öðrum hjörðum.

Sagði Eyþór að því komi ekki á óvart að kynbótamat fyrir gerð liggi hátt í þessari hjörð og sé meðaleinkunn þess nú 116 stig, sem sé sú hæsta á úrvalslistanum. Frjósemi væri annar eiginleiki sem væri afar góður í hjörðinni, en þar er meðaleinkunn 107 stig. Kynbótamat fyrir aðra eiginleika væri gott.

Ástríðufullt landgræðslustarf

Þau Eyþór Pétursson og Agnes Einarsdóttir hafa frá árinu 1977 nýtt jörðina Baldursheim 2 og stundað þar blandaðan búskap. Bústofninn keyptu þau af föðurbróður Eyþórs, Baldri Þórissyni, og konu hans, Ingibjörgu Friðjónsdóttur. Í dag telur bústofninn 190 kindur og 30 nautgripi. Í Baldursheimi eru rekin tvö bú en þar er einnig að finna Félagsbúið sem tilheyrir Baldursheimi 1. Þó fjárbúin séu aðskilin er mikil samvinna þar á milli og góðir hrútar lánaðir á víxl.

Í umfjölluninni kom fram að beitilönd við Baldursheim hafi verið rýr þegar þau Eyþór og Agnes hófu búskap en þau hafa lagt stund á landgræðslu með talsverðri ástríðu sem borið hefur góðan árangur. Árið 1998 var Eyþóri veitt Fjöreggið, viðurkenningu Landgræðslunnar, fyrir góðan árangur við landbætur.