Aukabúnaðarþing 14. ágúst

Stjórn Bændasamtaka Íslands boðar til aukabúnaðarþings föstudaginn 14. ágúst 2026 á Hotel Nordica í Reykjavík. Þar verður skýrsla milliþinganefndar um áhrif mögulegrar Evrópusambandsaðildar á íslenskan landbúnað kynnt og ályktað um hana. Formaður Bændasamtakanna segist vilja tryggja skýra aðkomu félagsmanna að þessu risastóra pólitiska máli.

Á Búnaðarþingi 2026, sem var haldið í mars síðastliðnum, var samþykkt að skipa sjö manna milliþinganefnd sem starfa skyldi fram að næsta Búnaðarþingi. Nefndinni var falið að greina hverjar afleiðingar aðildar Íslands að Evrópusambandinu yrðu á íslenskan landbúnað, þar með talið áhrif aðlögunar að regluverki sambandsins meðan á aðildarviðræðum stæði. 

„Stjórn Bændasamtakanna hefur tekið ákvörðun um að halda skuli aukabúnaðarþing Bændasamtaka Íslands 14. ágúst næstkomandi þar sem farið verður yfir niðurstöðu skýrslu milliþinganefndar og ályktað um afstöðu Bændasamtakanna gagnvart mögulegri aðild að Evrópusambandinu og þá með hagsmuni landbúnaðarins að leiðarljósi,“ segir Trausti Hjálmarsson, formaður Bændasamtaka Íslands. „Sú afstaða verður ekki byggð á tilfinningum eða orðagjálfri heldur verður stuðst við skýrslu milliþinganefndar þegar afstaðan verður mótuð. Það er vandað til vinnunnar og að gerð skýrslunnar hafa komið sérfræðingar bæði innan og utan skrifstofu Bændasamtakanna. Það er mikilvægt að byggja okkar stefnumótun í þessu máli eins og öðrum á þeim lýðræðislegu ferlum sem eru innan samtakanna. Þess vegna boðum við til aukabúnaðarþings. Við viljum tryggja skýra aðkomu okkar félagsmanna að þessu risastóra pólitiska máli og hlökkum til að takast á við umræðuna og að eiga samtal bæði við okkar félagsmenn og eins almenning í landinu um það hvaða þýðingu það muni hafa fyrir framtið landbúnaðar, fæðuöryggi og byggðafestu í okkar góða landi að ganga inn í Evrópusambandið.“

Milliþinganefnd Bændasamtaka Íslands hefur verið starfandi undanfarna mánuði með aðkomu sérfræðinga innan samtakanna jafnt sem utan. Niðurstöður vinnu nefndarinnar verða lagðar fram í formi skýrslu sem verður send þingfulltrúum eigi síður en tveimur vikum fyrir boðað aukabúnaðarþing. Á þinginu verður skýrslan kynnt og tekin til umræðu með það að markmiði að álykta um efni hennar við lok þingsins.

Til aukabúnaðarþings eru boðaðir þeir aðalmenn sem voru kjörnir til setu á Búnaðarþingi 2026 þar sem kjör búnaðarþingfulltrúa og varamanna þeirra gildir milli Búnaðarþinga. Bændasamtökin biðja þingfulltrúa að taka daginn frá til að koma til Reykjavíkur og sitja þingið sem snýr að mikilvægu málefni sem snertir hagsmuni bænda í heild og getur haft áhrif á framtíðarstarfsskilyrði landbúnaðar á Íslandi. Staðfesta þarf þátttöku á aukabúnaðarþingi fyrir 1. júlí 2026. Áður en að aukabúnaðarþingið hefst er áætlað að málþing um Evrópumál og landbúnað fari fram fyrr sama dag. Málþingið verður opið öllum.