Æðarbændur kynna fullunnar vörur

- Fáðu þér kríu á Hótel Holti

Vöruhönnuðir þróa nú fullunnar vörur úr eigin dúni og kynna nýtt vörumerki á HönnunarMars.

Æður er nýtt vörumerki sem Studio Erindrekar kynna á Hótel Holti á HönnunarMars sem fram fer víðs vegar á höfuðborgarsvæðinu dagana 6. – 10. maí. Erindrekarnir eru Íris Indriðadóttir og Signý Jónsdóttir en þær eru vöruhönnuðir og æðarbændur.

Æður er nýtt vörumerki

Íris og Signý hafa sinnt æðarbúskap í Skálanesi í Seyðisfirði undanfarin ár ásamt Sigrúnu og Pétri sem stundað hafa æðarrækt í Skálanesi og á Melrakkasléttu í fjöldamörg ár.

Markmið Írisar og Signýjar er að fullvinna vörur úr dúninum sínum til að auka verðmætasköpun innanlands. Þær bjóða gestum að skoða vörur sínar og nýja vörumerkið, Æður, inni á hótelherberjum Holtsins á HönnunarMars. Ætlun þeirra er að veita andartakinu á milli svefns og vöku sérstaka athygli og huga að miðdegislúrnum, enda fátt betra í annríki dagsins en smá kría. Viðburðurinn fer fram föstudaginn 8. maí og laugardaginn 9. maí frá 12–17.

Verðmætt hráefni

Þekking almennings á æðardúni er takmörkuð og fáir sem lúra undir íslenskri æðardúnssæng. Ákveðin dulúð ríkir yfir æðarbúskap en æðarfuglinn var fyrstur fugla til að vera friðaður.

Æðarræktarfélag hefur verið starfrækt á Íslandi frá 1969 og er æðarrækt stunduð um nánast allt land að Suðurlandsundirlendinu undanskildu. Sambýli manna og æðarfugla er sérlega fallegt og gagnkvæmt traust myndast þeirra á milli. Fuglarnir leita í mannfólkið og njóta samlífisins og verndarinnar sem í því felst.

Landbúnaðarháskóli Íslands menntar fólk í dúnmati en sala á dúni er samkvæmt lögum háð vottun og gæðamati sem byggir alfarið á skynjun dúnmatsmannsins sem skoðar dúninn, finnur af honum ilminn, hlustar á hann og snertir. Rúmlega þrjú tonn af æðardúni eru unnin á Íslandi ár hvert en stærstur hluti hans er fluttur úr landi.