7% lækkun á vörum
Helgi Rafn Gunnarsson, framkvæmdastjóri Biobús, og hans starfsfólk lækkuðu vöruverð um 7% á vörum fyrirtækisins og gildir lækkunina til 31. ágúst nk.
Meðal vöruflokka eru lífræn mjólk og fjölbreytt úrval jógúrtvara. „Viðbrögðin hafa verið mjög jákvæð. Innkaupastjórar verslanakeðjanna tóku þessari ákvörðun mjög vel og hétu því að skila verðlækkuninni að fullu til neytenda. Við finnum líka fyrir því að fólk tekur svona fréttum vel, sérstaklega þar sem umræðan síðustu mánuði hefur að mestu snúist um verðhækkanir og verðbólgu. Við vonum að þetta geri fleirum kleift að velja lífrænar mjólkurvörur,“ segir Helgi Rafn.
„Sumarið hefur verið einstaklega gott og lífrænu kýrnar hafa aldrei mjólkað jafn mikið. Salan hjá okkur hefur verið mjög góð síðustu mánuði og við höfum unnið úr allri þeirri lífrænu mjólk sem hefur verið í boði. Reyndar höfum við oft þurft að skammta vörur til verslana þegar hráefnið hefur ekki dugað,“ segir Helgi Rafn enn fremur.
En kemur til greina að 7% lækkunin haldi áfram eftir 31. ágúst? „Við höfum ekki tekið ákvörðun um það, sjáum til hvernig átakið gengur og hvernig mjólkurframboðið þróast þegar líður á haustið. Það mun ráða milklu um framhaldið, þannig við útilokum það ekki,“ segir Helgi Rafn. Hjá Biobúi vinna 11 starfsmenn.
