Vill einhver ættleiða hestabarn?

Hestamannafélagið Þytur í Vestur-Húnavatnssýslu hefur leitað til félagsmanna um hvort þeir séu tilbúnir að veita börnum aðgang að hesti í þeirra eigu. Hesturinn þarf að vera góður, þægur og traustur og tilbúinn í nýtt hlutverk, að ala upp unga knapa.

Miklar umræður urðu á fundi félagsins á dögunum um hvernig auka mætti nýliðun í hestamennsku, en vandamálið sé hvorki nýtt né staðbundið og yrðu hestamenn að vera vakandi og opnir fyrir öllum hugmyndum.

Ein hugmyndin sem kom upp á fundinum var að félagsmenn myndu „ættleiða hestabarn“, það er að segja, eigandi hests myndi veita aðgang að hrossi og aðstöðu og aðstoða þau börn og unglinga sem áhuga hefðu eða vantaði tækifæri til að ríða út. Á fundinum kom strax fram að tveir félagsmenn líklega geta boðið upp á þetta.

Í kjölfarið hefur hestamannafélagið leitað til félagsmanna til að taka þátt í verkefninu.

Á vef Þyts kemur fram að hestamannafélagið mun aðeins vera tengiliður og milligönguaðili.

Fyrirkomulagið mætti ræða í hverju tilviki fyrir sig, t.d. gætu 2–3 krakkar skipt með sér einum hesti.

Þeim hestamönnum, sem geta tekið þátt í framtakinu, er bent á að hafa samband við Kolbrúnu Indriðadóttur, formann félagsins.