Vegagerðin greiðir 70% kostnaðar
Skrifað hefur verið undir samkomulag milli Svalbarðsstrandarhrepps og Vegagerðarinnar vegna uppbyggingar göngu- og hjólastígs frá Vaðlaheiðargöngum og að Skógarböðum sem verið er að reisa í landi Ytri-Varðgjár í Eyjafjarðarsveit, handan Akureyrar.
Vegagerðin greiðir 70% kostnaðar sveitarfélagsins við stígagerðina en áætlaður kostnaður við 30% hlut Svalbarðsstrandarhrepps er um 200 milljónir króna.
„Þessi styrkur frá Vegagerðinni hefur gríðarlega þýðingu fyrir lítið sveitarfélag í svo stóru og metnaðarfullu verkefni og mun hann tryggja að stígurinn verði fullkláraður með áningastöðum og lýsingu sem tryggir öryggi þeirra sem um stíginn fara,“ segir Þórunn Sif Harðardóttir, verkefnastjóri hjá Svalbarðsstrandarhreppi.
Undirbúningur að lagningu göngu- og hjólastígs um sveitarfélagið hefur staðið yfir nokkur undanfarin ár, en skriður komst á þegar landeigendur Ytri-Varðgjár ákváðu að byggja upp Skógarböð, baðstað í landi þeirra, og nýta heita vatnið sem rennur óbeislað í Eyjafjörðinn. Þórunn segir verkefnið metnaðarfullt og með lagningu stígsins verði umferðaröryggi hjólandi og gangandi vegfarenda stórlega aukið á hættulegri leið. Áningastaðir verða á leiðinni með bekkjum, upplýsingaskiltum og aðstöðu fyrir notendur til að stoppa og njóta.
Malbikað í haust
Norðurorka sér um lagningu á leiðslum og flutningi vatns frá Vaðlaheiðargöngum og að baðstaðnum. Jafnframt verða lagðar lagnir sem munu flytja kalt vatn frá Vaðlaheiðargöngum til Akureyrar. Þórunn segir að lokið hafi verið við að grafa lagnaskurð í gegnum Vaðlareitinn fyrir vatnslagnir og nú um miðjan janúar verður klárað að sjóða saman lagnir í skurðinn.
Gert er ráð fyrir að stígurinn verði malbikaður haustið 2022.
