Norskir búvörusamningar
Viðræður eru í gangi um árlega búvörusamninga á milli norskra bænda og ríkisins.
Norskir bændur settu fram kröfu um greiðslur upp á 4,2 milljarða norskra króna, þar af 2,6 milljarða vegna verðhækkana á tilbúnum áburði og dísilolíu í kjölfar innrásar Bandaríkjamanna og Ísraels á Íran. Verð á áburði hefur þegar hækkað um 15% í Noregi og verð á gjaldfrjálsri dísilolíu um 35%.
Ríkið bauð bændum 3,2 milljarða. Í tilboðinu er meðal annars áhersla á aukna sjálfbærni, fræbirgðir og að norska þingið ákvað að tekjur bænda verði jafnar tekjum annarra launþega árið 2027. Samningsfrestur er til 16. maí. Samningar síðasta árs hljóðuðu upp á 1,1 milljarð.
Í svari atvinnuvegaráðuneytisins við fyrirspurn um hvort tekið sé mið af hækkun á verði á innfluttum nauðsynjavörum til landbúnaðarframleiðslu, í samningum um framlenginu búvörusamninga segir að „við ársframlengingu búvörusamninga er ekki gert ráð fyrir efnislegum breytingum nema að litlu leyti“.
„Tölur fjárlaganefndarinnar sýna greinilega að sú framleiðsla sem leggur mest af mörkum til sjálfbærni og nýtingar norskra auðlinda býr við ömurlega fjárhagsstöðu,“ segir Tor Jacob Solberg, leiðtogi norsku bænda- og smábændasamtakanna, í samtali við NRK.
Matvælaframleiðsla heimsins minnkar umtalsvert verði langvarandi vöntun á tilbúnum áburði. Sameinuðu þjóðirnar vara nú við vaxandi hungursneyð opni Hormússundið ekki.
