Umdeildir virkjanakostir í biðflokk
Jóhann Páll Jóhannsson vill Kjalölduveitu og virkjanakosti í Héraðsvötnum, það er Skatastaðavirkjun C, Skatastaðavirkjun D, Villinganesvirkjun og veiting Vestari-Jökulsár í Blöndu, í biðflokk. Verkefnastjórn verndar- og orkunýtingaráætlunar hefur lagt til að þessir virkjanakostir verði í verndarflokki.
Málið var til umsagnar í samráðsgátt og er núna í vinnslu áður en það verður lagt fyrir Alþingi. Alls bárust 155 umsagnir frá einstaklingum, samtökum og stofnunum. Má sjá að flestar eru neikvæðar og taka undir umsögn frá SUNN, Samtökum um náttúruvernd á Norðurlandi, sem setja sig upp á móti því að færa virkjanakosti í Héraðsvötnum í nýtingarflokk.
Í umsögn SUNN er því haldið fram að þetta sé aðför að einu gjöfulasta vatnasvæði héraðsins ásamt því að vera aðför að því stjórntæki sem Rammaáætlun er. „Faghópar í 3. og 5. áfanga hafa vandað til verka og unnið sín störf af heilindum og virðingu fyrir náttúrunni, og ítrekað flokkað virkjanir í Héraðsvötnum í verndarflokk með ótvíræðum hætti. Að hafa vinnu þessara faghópa að engu, með því að ganga gegn ráðleggingum þeirra myndi rýra traust til Rammaáætlunar, enda voru Héraðsvatnakostir nýlega metnir með hæsta verndargildið af öllum kostum áfangans.“ segir í umsögninni.
„Í 5. áfanga Rammaáætlunar var óskað eftir endurmati á fyrri niðurstöðum, en áhrif virkjana voru hugsanlega ofmetin, fannst umhverfis- og samgöngunefnd Alþingis. Nýr faghópur tók til starfa frá grunni og komst að því að ekkert ofmat hafði átt sér stað. Í 5. áfanga var einnig fenginn óháður sérfræðingur frá Svíþjóð, Christer Nilsson, til þess að vinna sjálfstætt mat á verðmætum og áhrifum virkjanakostanna þriggja í Héraðsvötnum og í séráliti sem hann skilaði var skemmst frá því að segja að hann staðfesti niðurstöður kollega sinna á Íslandi.
Ein af áherslum Jóhanns Páls, ráðherra orku- umhverfis og loftslags, er að standa vörð um líffræðilegan fjölbreytileika á Íslandi – en að raska jafnvægi jökulfljótanna í Skagafirði með virkjunum er alls ekki því til stuðnings, þvert á móti. Fjölbreytt líf á landi og legi er háð þessum fljótum, það er ekki nein spurning um það eins og faghópar Rammaáætlunar hafa bent á og varað við,“ segir í umsögn SUNN.
