Tvíburar í landsliðsflokk!

Áskorendaflokki Skákþings Íslands er nýlokið. Mikil keyrsla var á mótinu, teflt dag eftir dag í heila viku, níu kappskákir. Til mikils var að vinna á mótinu, en efstu tvö sætin gefa þátttökurétt í landsliðsflokki Skákþings Íslands, þar sem alla jafna tefla tíu til tólf manns allir við alla. Reyndar er þetta í síðasta sinn í bili sem áskorendaflokkur veitir sæti í landsliðsflokki – á aðalfundi Skáksambandsins var tillaga um nýjan lokaðan meistaraflokk samþykkt. Í næsta áskorendaflokki munu því þrjú efstu sætin, í stað tveggja, gefa þátttökurétt í meistaraflokki.

Bárður Örn Birkisson þótti ef til vill ekki líklegur til afreka eftir fyrsta dag mótsins þar sem hann fékk hálfan vinning af tveimur. En díselvélin var sett í gang og 6½ vinningur fékkst í næstu sjö skákum. Glæsilegur árangur hjá Bárði. Tvíburabróðir hans, Björn Hólm Birkisson, endaði einnig með sjö vinninga og var ofar Bárði að oddastigum og vann mótið í ár. Fjórir skákmenn fengu sex vinninga. Tveir þeirra höfðu verið lengst af í toppbaráttunni í mótinu, Óskar Víkingur Davíðsson og greinarhöfundur. Ánægjulegt er að sjá metnað Óskars við borðið eftir nokkurra ára hlé frá skákiðkun, en hann var á sínum tíma Norðurlandsmeistari í sínum aldursflokki. Greinarhöfundur hafði ákveðið fyrir um ári síðan, og haldið því markmiði merkilegt nokk fyrir sjálfan sig, að vinna þetta tiltekna mót. Skellti hann sér m.a til Hollands á skákmót um hvítasunnuhelgina til undirbúnings. Háleit markmið skiluðu miklu sjálfstrausti og það var ekki fyrr en í lokaumferðinni sem möguleikinn rann honum úr greipum. En ef maður miðar til tunglsins þá gæti maður náð til stjarnanna.

Tveir aðrir skákmenn fengu sex vinninga eftir góðan lokasprett, þeir Sigurbjörn Björnsson Fide-meistari og Sigurbjörn Hermannsson, núverandi meistari Skákskólans. Af 34 keppendum hækkaði enginn meira á stigum en Pétur Úlfar Ernisson, eða um heil 98 stig.

Af öðrum skákviðburðum má nefna að Skákdeild Fjölnis hélt fyrir skömmu glæsilegt sumarmót þar sem 83 börn mættu til leiks. Þau fengu öll verðlaun, en Hagkaup, Dominos, Boltamaðurinn og Bókabúð Grafarvogs gáfu öll verðlaunin ásamt því að Rótarý Grafarvogi gaf verðlaunabikara. Stórmeistarinn Helgi Áss Grétarsson hélt fjöltefli fyrir mótið. Þeir Anh Hai Tran og Emil Finnsson Fenger fengu báðir fullt hús í mótinu. Ef lesendur Bændablaðsins luma á áhugaverðum skákum geta þeir haft samband. 

Umsjón: Gauti Páll Jónsson gauti.pj[hjá]hotmail.com