Tuttugu og einn útskrifaðist af garðyrkjubrautum LbhÍ
Brautskráning nemenda af garðyrkjubrautum við Landbúnaðarháskóla Íslands fór fram í Hveragerðiskirkju 26. maí sl. Alls var 21 nemandi brautskráður.
Sjö luku bóklegum hluta í garðyrkjuframleiðslu en námið er þannig upp sett að nemandi klárar tvö ár bókleg á Reykjum í Ölfusi og tekur svo verklegt nám innan greinarinnar.
Fjórtán í skrúðgarðyrkju
Níu nemendur luku bóklegu námi í skrúðgarðyrkju og fimm útskrifuðust sem skrúðgarðyrkjufræðingar en það nám er löggild iðngrein.
Í garðyrkjuframleiðslu hlutu þrír nemendur viðurkenningu.
Þröstur Þórsson hlaut viðurkenningu fyrir hæstu einkunn á garð- og skógarplöntulínu með 9,61.
Íris Grétarsdóttir hlaut viðurkenningu fyrir hæstu einkunn af línu lífrænnar ræktunar matjurta með einkunnina 9,59.
Í ylræktun var Ingvari Þorsteinssyni færð viðurkenning fyrir bestan árangur með einkunnina 9,20.
Jóhann Böðvar Skúlason fékk viðurkenningu fyrir hæstu meðaleinkunn útskrifaðra nema úr bóklegu og verklegu námi á skrúðgarðyrkjubraut en meðaleinkunn hans var 8,6.
Helle Laks fékk viðurkenningu fyrir hæstu einkunn úr bóklegu skrúðgarðyrkjunámi eða 9,75. Hún var einnig dúx skólans að þessu sinni.
Sæmundur Sveinsson, rektor LbhÍ, og Guðríður Helgadóttir, forstöðumaður starfs- og endurmenntunardeildar og staðarhaldari á Reykjum, fluttu ávörp og óskuðu nemendum til hamingju með daginn.
Við athöfnina söng Einar Clausen tvö lög við undirleik Jóns Kristófers Arnarsonar.
