Tollurinn með kartöflumál til skoðunar
Bændablaðið hefur nýlega fjallað um erfiða samkeppnisstöðu íslenskra kartöflubænda og þann grun um að verið sé að flytja inn ferskar matarkartöflur í töluverðu magni á öðrum tollfrjálsum tollnúmerum, líkt og númerum bökunarkartafla. Tollurinn er nú með málið til skoðunar.
Innflutningur á kartöflum hefur aldrei mælst meiri en á síðastliðnu tímabili ágúst til febrúar samkvæmt samantekt Bændasamtaka Íslands á gögnum frá Hagstofu Íslands og innlfutningstölum frá skattinum út frá tollnúmerum. Í grein Sigurðar Más Harðarsonar fréttamanns hjá Bændablaðinu kemur fram að kartöflubændur rekja aukinn innflutning til þess að vægi verndartolla fyrir innlendu framleiðsluna hafi rýrnað mjög frá ári til árs og þar sem innlendir kartöflubændur eru krónutölubundnir haldi þeir ekki í við almenna verðlagsþróun.
Jón Helgi Helgason, kartöflubóndi á Þórustöðum í Eyjafirði, hefur kallað eftir því að úttekt verði gerð á tollaeftirliti þegar kemur að kartöflum. Hann telur að leiðrétta þurfi tollskráningu fyrir bökunarkartöflur þar sem rökstuddur grunur sé um að verið sé að flytja inn ferskar venjulegar kartöflur í töluverðu magni á öðrum tollfrjálsum tollanúmerum og þetta megi lesa úr innflutnings- og sölutölum. Að sögn Jóns er söluminnkun á kartöflum svo mikil að það hljóti að vera koma kartöflur annars staðar frá inn á íslenskan markað. Hann telur að ef þessi þróun heldur áfram óbreytt muni íslensk kartöflurækt leggjast af.
