Tindaherfi reynist vel gegn illgresinu
VOR, félag framleiðenda í lífrænum búskap, fékk styrk frá stjórnvöldum á síðasta ári til kaupa á tækjabúnaði fyrir sitt félagsfólk sem á að prófa í þeim tilgangi að halda illgresi niðri á ökrum og í görðum. Gunnar Bjarnason, kornog kartöflubóndi í Litlu-Hildisey í Austur-Landeyjum, hefur verið með annað tækið í sumar og segir að slíkur tækjabúnaður muni breyta öllu fyrir sig.
Elínborg Erla Ásgeirsdóttir, formaður VOR, segir að tækið sem Gunnar hafi fengið til prufu hafi verið tindaherfi af gerðinni Treffler-tindaherfi. „Hann hefur gert skipulegar tilraunir með það í sumar og er hæstánægður,“ segir hún. Hann sé bæði ánægður með þann tímasparnað sem tækið færir honum, auk þess sem hann væntir meiri uppskeru.
Reynslu miðlað á milli bænda
„Hins vegar var keypt raðhreinsitæki af gerðinni K.U.L.T, en það er svokallaður fingrahreinsari. Ég prófaði það tæki aðeins í sumar, en það fór svo til gulrótabændanna í Akri Organic og verður þar út næsta sumar í prófunum.
Við vonumst fyrst og fremst til að geta aflað upplýsinga um hvernig tækin virka og miðlað svo þeim upplýsingum áfram til að auðvelda fólki ákvarðanatöku hvað þetta varðar,“ segir Elínborg.
Útheimtir talsverða vinnu
Í lífrænni ræktun er fjölbreyttum aðferðum beitt til að vinna gegn illgresi. Eitur- og varnarefni eru bönnuð hjá bændum með lífræna vottun og því þurfa þeir að nota skiptiræktun, jarðvinnslu og tiltækan tækjabúnað til að halda illgresinu í skefjum.
Það getur því útheimt talsverða vinnu að uppræta óhóflegan illgresisvöxt, auk þess sem hann getur dregið mjög úr uppskeru.
