Þrjátíu þjóðerni í Rangárþingi ytra

Laugardaginn 9. maí verður fjölmenningarhátíð haldin í íþróttahúsinu á Hellu frá klukkan 14:00.

Um 20 þjóðerni munu kynna sitt land og sína menningu á hátíðinni. „Markmið hátíðarinnar er að efla sýnileika fjölmenningar, skapa vettvang fyrir íbúa til að kynna menningu sína og stuðla að samkennd, þátttöku og inngildingu í samfélaginu,” segir Jóhann G. Jóhannsson, Íþrótta- og fjölmenningarfulltrúi hjá Rangárþingi ytra.

Í Rangárþingi ytra eru um 30 þjóðerni af fólki eins og frá Spáni, Danmörku, Taílandi, Litáen og Portúgal svo einhver lönd séu nefnd. „Þátttakendur verða styrktir af sveitarfélaginu og einnig af SS og Holta, sem munu leggja til kjöt og kunnum við þeim miklar þakkir fyrir. Þetta er samstarf Rangárþings ytra og eystra en hátíðin var haldin af eystra í fyrra á Hvolsvelli og heppnaðist gríðarlega vel. Við reiknum með mörg hundruð gestum á hátíðina 9. maí”, bætir Jóhann við.