Þorvarður Ingimarsson og Spaði frá Eyrarlandi sigruðu í A-flokki

Höfundur: AJH

Síðara haustmót Austurlandsdeildar SFÍ var haldið að Eyrarlandi 11. nóvember síðastliðinn. Eftir að hafa lengst af ferðast í grenjandi rigningu og svartaþoku voru farnar að renna tvær grímur á þá keppendur sem komu að.

Það var þó ekki ástæða til að örvænta því þegar sá í Eyrarland létti til og fór mótið fram við góðar aðstæður þótt þokan hafi aðeins reynt að stríða þátttakendum á köflum. Á Eyrarlandi var öll umgjörð til fyrirmyndar eins og fyrri daginn og valinn maður í hverju rúmi. Þar var gott brautarstæði með ágætri yfirsýn og kindurnar þjálar. Aðeins sog frá útihúsum en kindurnar voru sanngjarnar og gáfu áreynslulítið eftir þegar hundarnir sneru þeim. Vegleg verðlaun voru í boði en Jötunn Egilsstöðum og Landstólpi Egilsstöðum styrktu deildina með verðlaunum í formi hundafóðurs.

Alls tóku níu hundar þátt og hundar í A-flokki fengu tvö rennsli hver og gilti betra rennslið til úrslita. Dómari var Agnar Ólafsson frá Tjörn.

Deildin þakkar öllum sem komu að mótinu með einum eða öðrum hætti kærlega fyrir. Reglulega gaman að það hafi verið hægt að koma á tveimur deildarmótum þetta árið. Menn og hundar reynslunni ríkari. Vonandi ávísun á það sem koma skal.

Úrslit í unghundaflokki

(100 stiga keppni)

Sverrir Möller og Garri frá Auðólfsstöðum – 63 stig (M: Týra frá Hafnarfirði - F: Grímur frá Daðastöðum)
Sverrir Möller og Kári frá Auðólfsstöðum – 61 stig (M: Týra frá Hafnarfirði - F: Grímur frá Daðastöðum)
Sigurður Max Jónsson og Tása frá Ósi, ógilt (M: Káta frá Ósi – F: Snati frá Eyrarlandi)

A-FLOKKUR (110 stiga keppni)

Þorvarður Ingimarsson og Spaði frá Eyrarlandi - 95 stig (M: Lýsa frá Hafnarfirði – F: Prins frá Daðastöðum)
Elísabet Gunnarsdóttir og Kolur frá Húsatóftum - 82 stig (M: Kría frá Daðastöðum – F: Brúsi frá Brautartungu)
Elísabet Gunnarsdóttir og Panda frá Daðastöðum - 79 stig (M: Skotta frá Daðastöðum – F: Dan frá Skotlandi)

Skylt efni: smalahundar | Smalahundafélag Íslands