Þekkingarsetur um úrgangsmál tekið til starfa á Laugarvatni
Sigurður Ingi Jóhannsson samgöngu- og sveitarstjórnarráðherra undirritaði nýlega samkomulag um fjárstuðning við Samtök sunnlenskra sveitarfélaga (SASS) til að stofna þekkingarsetur á Laugarvatni um úrgangsmál.
Tilgangur setursins er að aðstoða sveitarfélög við að innleiða hringrásarhagkerfi í úrgangsmálum með megináherslu á endurnýtingu og þar með að draga úr urðun heimilisúrgangs.
Ásgerður Kristín Gylfadóttir, formaður bæjarráðs á Hornafirði og formaður SASS, undirritaði samkomulagið ásamt Sigurði Inga.
„Með þessari styrkveitingu er ætlunin að skapa mikilvægan vettvang til að veita sveitarfélögum ráðgjöf og gera kleift að standa við markmið sín varðandi úrgangsmál og stuðla að framþróun og uppbyggingu á því sviði,“ segir Sigurður Ingi.
Þekkingarsetrið mun aðstoða sveitarfélög við að halda utan um málaflokkinn og laga sig að nútímalegri úrgangsstjórnun. Það mun einnig birta upplýsingar um þjónustugjöld og raunkostnað við afsetningu úrgangs í öllum sveitarfélögum og koma á samræmingu á úrgangsgögnum frá mismunandi þjónustuaðilum.
