Þari í sauðakjöt, krydd og kex

Nýtt frækex, unnið úr íslenskum þara, er komið á innlendan markað.

Fine Foods Íslandica er fyrsta þararæktar- og matvælaframleiðslufyrirtæki Íslands sem býr til sprota úr íslenskum þara og ræktar þá á reipum allt til uppskeru, að sögn stofnanda þess, Jamie Lai Boon Lee.

Hún telur að þang og þari geti gegnt mikilvægu hlutverki í að endurlífga dreifbýlissamfélög og varðveita sjávarútvegsmenningu, sé það ræktað með góðum ásetningi og við viðeigandi aðstæður. Með því að deila þekkingu og aðgengi að mörkuðum með nýjum ræktendum í heimabyggð leggi aðstandendur fyrirtækisins sig fram um að byggja upp sanngjarna og sjálfbæra þaraframleiðslu. Þau séu allt í senn matreiðslufólk, sjómenn, skapandi einstaklingar, vísindamenn, bændur, sjávarafurðavinnslufólk, bakarar, viðskiptaráðgjafar, iðnaðarmenn – og síðast en alls ekki síst; þararæktendur.

Fine Foods Íslandica hefur aðsetur á Hólmavík á Ströndum.

Þari í allt mögulegt

Í vefverslun fyrirtækisins er til dæmis í boði Þara-jerky, þ.e. íslenskt sauðakjöt með þara. Þar má einnig finna Sjávargarðsblöndu, krydd samsett úr beltisþara, sölvum, wakame og nori sem sagt er gefa ilm, mjúkt umami-bragð og næringu þegar það er sett út í mat.

Sjávardrykkjuduft er kraftur úr villtum kræklingum, sykurþara, sveppum og reyktum fiski til að gera úr soð eða sósugrunn. Þá selja þau Harðfisk furikake-krydd sem sagt er bæði fæðubótarefni og gott út á heit hrísgrjón til að auka næringargildi þeirra og gera þau lystugri.

Nú síðast kom á innanlandsmarkað varan Þara Frækex, hágæða snakk sem sagt er sameina þara og fræ, þróað með sjálfbærum og náttúrulegum áherslum. Sjá má á vefsíðu fyrirtækisins hvar vörurnar fást í verslunum.

Framleiðendur segja mikla áherslu lagða á heilnæmi vörunnar; hún innihaldi engin aukaefni, auk þess sem umhverfisáhrif séu takmörkuð til hins ýtrasta.

Nú er í þróun bæði þarasnakk og sósa, að sögn Jamie. Jafnframt er í þróun áburður fyrir grænmetisog ávaxtaræktun, sem framleiddur er á staðnum til að gjörnýta alla þarauppskeruna á sjálfbæran hátt.

Glöggt er gests augað

Hin kínversk-bandaríska Jamie flutti til Íslands árið 2016 eftir að hafa ferðast víða og búið í San Francisco og Hong Kong. Hún kom fyrst til landsins sem ferðamaður árið 2014 og ákvað síðar að setjast að á Vestfjörðum til að læra auðlindastjórnun sjávar. Þar hóf hún rannsóknir á sjálfbærri þararækt, eftir að hafa komist að því að meirihluti þaraframleiðslu í Evrópu byggir á uppskeru villtra þaraskóga.

Hún lauk meistaragráðu í haf- og strandsvæðastjórnun frá Háskólasetri Vestfjarða og stofnaði fyrirtækið Fine Foods Íslandica í Króksfjarðarnesi árið 2021. Fyrsta uppskeran úr tilraunaræktun hófst árið 2020 og fyrsta varan, súpuduft úr kræklingi og þara, var kynnt fljótlega eftir stofnun fyrirtækisins.