Tæknin er nýtt til hins ítrasta á Landsmóti

Það er að mörgu að hyggja fyrir tæknistjóra Landsmóts, Rúnar Birgi Gíslason. Því þó að Landsmótið snúist að mestu um hesta og mannfagnað þá þarf að leggja margar snúrur og marga kapla til að sinna öllum þeim kröfum sem gestir og keppendur gera.

Rúnar segir starf sitt að mestu fólgið í því að skipuleggja aðkomu mismunandi tæknimanna.
Vel þurfi að passa upp á hljóðflæði á svæðinu og að hljóðið heyrist vel í áhorfendabrekkum en trufli ekki hestana.

Upptaka fyrir sjónvarp fer fram á báðum völlum alla keppnisdagana og sitja menn í myndstjórn við að setja kynningar og upplýsingar ofan á myndina sem birtist á risaskjá við aðalvöllinn. Myndin fer einnig í OZ-appið þar sem fólk getur horft á mótið meðan á því stendur og jafnvel eftir á, gegn greiðslu og til WorldFengs þar sem hægt er að kaupa sérstaka myndbandaáskrift.

Kynningar og upplýsingar sem birtast á skjám og í sjónvarpi eru allar sóttar rafrænt  og þær flæða líka áfram inn í landsmótsappið þannig að allir eiga að geta séð rauntíma rásröð og stöðu hvar sem þeir eru.
Til að allt þetta geti flætt milli staða á þeim hraða sem fólk vill þarf öflugar lagnir og hefur því verið lagður ljósleiðari milli allra helstu punkta svæðisins.Mikil vinna liggur að baki hönnun og stjórnun tæknimála á mótinu.