Styrkir til verslana
Sex dagvöruverslanir í minni byggðarlögum kringum landið hlutu styrki frá innviðaráðherra á dögunum.
Ráðherra staðfesti tillögur valnefndar um verkefnastyrki til verslana í dreifbýli, sem veittir eru á grundvelli stefnumótandi byggðaáætlunar fyrir árin 2022– 2036 að því er fram kemur á vef Stjórnarráðsins. Að þessu sinni var sautján milljónum kr. úthlutað til sex verslana í dreifbýli fyrir árið 2025.
„Markmiðið með styrkjunum er að styðja við dagvöruverslanir í minni byggðarlögum fjarri stórum byggðakjörnum á fámennum markaðssvæðum til að viðhalda mikilvægri grunnþjónustu. Ýmist eru veittir rekstrarstyrkir eða styrkir til endurbóta eða sjálfvirknivæðingar. Samtals bárust sex umsóknir fyrir samtals 41,8 m.kr,“ segir í tilkynningu frá Stjórnarráðinu. Eftirtaldar verslanir fengu styrki:
BakkaBúðin ehf., Reykhólum: 5 m.kr. rekstrarstyrkur
Verzlunarfjelag Árneshrepps: 3 m.kr. rekstrarstyrkur
Hríseyjarbúðin: 2,5 m.kr. styrkur til endurbóta og sjálfvirknivæðingar
North East Travel ehf., Bakkafirði: 1,5 m.kr. rekstrarstyrkur
Gunnubúð ehf., Raufarhöfn: 3 m.kr. styrkur til endurbóta
Verslunarfélag Drangsness: 2 m.kr. rekstrarstyrkur.
