Stöðugur samdráttur í hrossaútflutningi
Frá árinu 2022 hefur samdráttur verið stöðugur í útflutningi íslenskra hrossa.
Í yfirliti Ráðgjafarmiðstöðvar landbúnaðarins (RML) sést að frá árinu 2014 voru flest hross flutt úr landi árið 2021, eða 3.337 hross, en síðan hefur verið samdráttur. Mestur var samdrátturinn árið 2022 þegar hann var 38 prósent, en á síðasta ári var hann 17 prósent og þá voru 1.318 hross flutt úr landi.
Erlendir aðilar rækta íslensk hross á Íslandi
Í umfjöllun RML segir að vel sé þekkt að erlendir aðilar rækti hross á Íslandi og flytji út ýmist folöld og trippi eða tamin hross.
Í greiningu á vefnum vegna útflutnings á síðasta ári má sjá að í 48 prósenta tilvika er útflutningsaðili bæði íslenskur ræktandi og íslenskur skráður eigandi við útflutning. Í 37 prósenta tilvika er ræktandi íslenskur en erlendur eigandi, í 14 prósenta tilvika er erlendur ræktandi og erlendur eigandi er skráður við útflutning og í 14 prósent tilvika er ræktandi erlendur en íslenskur eigandi. Samkvæmt þessu var eitt af hverjum sjö útfluttum hrossum á síðasta ári ræktað af erlendum aðilum.
Mest flutt út frá Suðurlandi
Mest var flutt úr frá Suðurlandi, eða 39 prósent hrossa, 32 prósent frá Norðurlandi, 11 prósent frá Vesturlandi, tíu prósent frá svæði tilbúinna fæðinganúmera, þrjú prósent frá bæði Reykjavík og nágrenni og Austurlandi og loks eitt prósent frá Vestfjörðum.
Mælaborð íslenskrar hrossaræktar
Í umfjölluninni á vef RML um útflutning hrossa er í lokin komið inn á nýjungar sem búast megi við í nýjum WorldFeng á næstu árum.
Gefið er í skyn að tækifæri muni ef til vill gefast til að skapa eitthvað sem heitið gæti Mælaborð íslenskrar hrossaræktar þar sem hægt yrði að nálgast ýmsar tölulegar upplýsingar um hrossaræktina í rauntíma.
