Stjórn BÍ lýsir yfir þungum áhyggjum af stöðu sauðfjárræktarinnar
Stjórn BÍ hefur sent frá sér yfirlýsingu þar sem hún lýsir yfir þungum áhyggjum af stöðu sauðfjárræktarinnar í landinu og þeim miklu afurðaverðslækkunum sem virðast vera í farvatninu. Yfirlýsingin er birt hér í heild sinni:
Stjórn Bændasamtaka Íslands lýsir yfir þungum áhyggjum af stöðu sauðfjárræktar í landinu. Þær miklu afurðaverðslækkanir sem boðaðar hafa verið í haust auk seinkana á greiðslum munu valda bændum verulegum vanda á næstu mánuðum.
Ljóst er að sauðfjárbændur munu eiga í erfiðleikum með að standa við skuldbindingar sínar. Í boðuðum lækkunum felst meira en þriðjungs tekjuskerðing samhliða hærri fjármagnskostnaði sökum dráttar á greiðslum. Verði lækkunin öll að veruleika setur hún afurðaverðið aftur á þann stað sem það var fyrir áratug sem er ekkert minna en stórfelld kjaraskerðing. Á sama tíma hefur hagur neytenda batnað verulega því sá sem keypti lambakjöt fyrir andvirði klukkustundar vinnu árið 2008 er nú aðeins 37 mínútur að vinna fyrir sama magni.
Stjórn BÍ hvetur félagsmenn til að ræða strax við sína birgja og viðskiptabanka um þessa alvarlegu stöðu og leita með þeim lausna. Bændasamtökin munu veita allan þann stuðning sem þeim er fært í þeirri baráttu.
Rætt hefur verið við stjórnvöld um mögulegar aðgerðir til að draga úr framleiðslu til lengri tíma litið. Vonir standa til þess að þar náist niðurstaða, en hún tekur ekki á þeim bráðavanda sem uppi er. Stjórn BÍ telur skynsamlegast að taka á honum með sambærilegum aðferðum og tíðkast í samanburðarlöndum okkar í samskonar tilvikum þar sem gripið er inn í markaðinn ef aðstæður sem þessar koma upp.
