Sjálfboðaliðar lagfæra göngustíg í Hallormsstaðaskógi
Höfundur: Margrét Þóra Þórsdóttir
Ungmenni frá sjálfboðaliðasamtökunum SEEDS unnu fyrr í haust við endurbætur á gönguleið í Hallormsstaðaskógi. Þau eru frá átta Evrópulöndum.
Þau unnu við viðgerð og betrumbætur á 2 km gönguleið sem liggur upp í fjallið á Hallormsstað, ofan við hótelið í skóginum. Gönguleiðin er mjög mikið notuð af erlendum gestum hótelsins og öðrum gestum skógarins. Í brattlendi verða gönguleiðir fljótt hálar á sumum stöðum. Var því orðið mjög brýnt að lagfæra leiðina og auka þar með öryggi gesta.
Þetta er annað árið sem sjálfboðaliðar frá SEEDS-samtökunum koma í Hallormsstaðaskóg og lagfæra gönguleiðir í skóginum, en þeir njóta verkstjórnar reynslumikils starfsfólks Skógræktarinnar á Hallormsstað, að því er fram kemur á vef Skógræktarinnar.
