Sauðfjárbændur fresta auka aðalfundi
Fyrirhuguðum aðalfundi Landssamtaka sauðfjárbænda (LS), sem halda átti í dag, hefur verið frestað þangað til boðaðar tillögur stjórnvalda að lausn vanda sauðfjárbænda liggja fyrir.
Á vef samtakanna kemur fram að boðun á auka aðalfundinum hafi verið í ljósi upplýsinga úr atvinnuvega- og nýsköpunarráðuneytinu þess efnis að endanlegar útfærslur á þeirra tillögum yrðu tilbúnar í olok þessarar viku þannig að hægt yrði að kynna þær á auka aðalfundinum.
Þar kemur einnig fram að LS hafi verið í viðræðum við stjórnvöld frá því í mars um stöðu greinarinnar og yfirvofandi verðfall til bænda. Í þeim viðræðum hafi LS ásamt Bændasamtökum Íslands lagt fram heildstæðar tillögur að lausn vandans sem miða að því að koma í veg fyrir hrun í sauðfjárbúskap á Íslandi og styrkja greinina til framtíðar.
„Á miðvikudag bárust hins vegar þau skilaboð frá atvinnuvegaráðuneytinu að tillögurnar yrðu ekki tilbúnar fyrr en um miðja næstu viku og því ekki hægt að kynna þær á fundinum. Það var því ljóst að boðaður auka aðalfundur á föstudag myndi ekki geta tekið afstöðu til tillagna stjórnvalda og því hefur verið ákveðið að fresta auka aðalfundi þar til boðaðar tillögur liggja fyrir.
Tillögurnar eins og þær hafa verið kynntar LS eru spor í rétta átt en samtökin telja þær ekki ganga nógu langt til að leysa vandann eins og þær líta út í dag. Sauðfjárbændur hafa fundið fyrir auknum skilningi undanfarna daga og ljóst er að margir hafa áhyggjur af stöðu greinarinnar, meðal annars hafa margar sveitarstjórnir ályktað um málið og fjölmiðlar sýna því vaxandi áhuga. Enn skortir þó á skilning stjórnvalda til þess aðgerðirnar sem ráðast þarf í hafi þann styrk að leysa málið til frambúðar. Það þarf að breytast,“ segir á vef LS.
