Samningur um rekstur Áfangastaðastofu

Samningur á milli Markaðs­stofu Norðurlands og landshluta­samtakanna á Norðurlandi, Samtaka sveitarfélaga á Norður­landi vestra og Samtaka sveitar­félaga á Norðurlandi eystra um rekstur Áfangastaðastofu hefur verið undirritaður. Með því lýkur ferli sem formlega hefur staðið yfir allt frá árinu 2017 þegar hafinn var undirbúningur að gerð fyrstu áfangastaðaáætlana svæðanna.

Í raun nær ferlið til ársins 2015 þegar Markaðsstofur landshlutanna setur fram stefnu um að fá skýrari tengingu við stjórnvöld ferðamála, skilgreind hlutverk og öfluga fjármögnun til lengri tíma.

Áfangastaðastofur eru samstarfs­vettvangur sveitarfélaga, ríkis og atvinnugreinarinnar og er markmiðið með stofnun þeirra að efla stoðkerfi ferðaþjónustunnar og stuðla að jákvæðum framgangi hennar. Meðal hlutverka eru gerð áfangastaðaáætlana, taka þátt í gerð stefnumótunar í ferðaþjónustu, þarfagreining rannsókna, vöruþróun og nýsköpun, mat á fræðsluþörf auk þess að sinna svæðisbundinni markaðssetningu og vera grunneining í stoðkerfi ferðamála í landshlutunum.

Markaðsstofa Norðurlands hefur verið með samning við Ferða­málastofu um stoðkerfi ferðaþjónustu á starfssvæði sínu en nú hefur sá samningur verið færður yfir í samning atvinnuvega- og nýsköpunarráðuneytis, Ferða­málastofu og Landshluta­samtakanna.
Samstarf við Íslands­stofu verður einnig eflt í þessu samhengi og gerður sér­stakur samningur um markaðs­setningarverkefni.

Samstaðan er fagnaðarefni

„Það er mikið fagnaðarefni að samstaða hefur verið á Norðurlandi um að halda áfram úti markvissu starfi fyrir landshlutann í heild sinni undir merkjum Norðurlands eða North Iceland eins og verið hefur frá árinu 2003 þegar Markaðsstofan var stofnuð. Stefna MN verður óbreytt, að aukning verði á vægi ferðaþjónustu allt árið sem tryggi uppbyggingu innviða, greiðar samgöngur, fleiri heilsársstörf og meiri framlegð í greininni. Ein af grundvallarforsendum þess er að beint áætlunarflug hefjist til Norðurlands,“ segir í tilkynningu.

Innviðaþróun og markaðssetning

„Segja má að verkefnin skiptist í tvær deildir við þessa samninga, annars vegar innviðaþróun og hins vegar markaðssetningu. Ekki er þó um grundvallarbreytingu á verkefnum Markaðsstofunnar að ræða. MN mun áfram vinna þétt með fyrirtækjunum og sveitarfélögunum á svæðinu að framgangi ferðaþjónustunnar og hvetjum ykkur til að vera í sambandi við okkur varðandi öll verkefni eða ef spurningar vakna um þessa nýju samninga um Áfangastaðastofu.“