Samdráttur í leyfðum kvóta ársins

Leyft verður að veiða alls 800 hreindýr á þessu ári, 403 tarfa og 397 kýr. Þessi fjöldi er með fyrirvara um að ekki verði verulegar breytingar á stofnstærð fram að veiðum.

Flest dýr má fella á svæði 1 en fæst á svæði 8. Gjald fyrir veiðileyfi í ár er 193 þ.kr. fyrir tarf og 110 þ.kr. fyrir kú.

Fækkun veiðiheimilda um 101 dýr frá fyrra ári er sögð stafa fyrst og fremst af skorti á gögnum um vöxt og viðkomu hreindýrastofnsins árið 2023 í kjölfar hörmulegs banaslyss sem varð við hreindýratalningar þegar flugvél fórst í Sauðárhlíðum í júní það ár.

Takmarkanir og tilmæli

Veiðitími hreindýratarfa er frá miðjum júlí til miðs september en til 1. ágúst ekki heimilt að veiða tarfa séu þeir í fylgd með kúm og ef veiðarnar trufla kýr og kálfa í sumarbeit.

Veiðitími kúa er frá ágústbyrjun til og með 20. september en þeim tilmælum beint til veiðimanna að forðast í lengstu lög að fella mylkar kýr með kálfa og beina veiðum að geldkúm. Er þessum tilmælum ætlað að draga úr áhrifum veiða á kálfa og stuðla að því að þeir verði ekki móðurlausir fyrir 12 vikna aldur. Ekki er heimilt að veiða kálfa.

Jafnframt eru veturgamlir tarfar alfriðaðir og veiðar miðast því við tveggja vetra tarfa og eldri.

Á vef Umhverfisstofnunar, sem sér um sölu veiðileyfa, segir að í því skyni að draga úr líkum á að hreindýr á veiðisvæði 9 leiti milli sauðfjárveikivarnahólfa yfir í Öræfasveit skuli eftir fremsta megni reynt að veiða sem stærstan hluta kvótans vestast á svæðinu í Suðursveit. Tilmælunum sé einnig ætlað að stuðla að fækkun hreindýra sem gengið hafa á Breiðamerkursandi og valdið þar skemmdum á viðkvæmum gróðri

Námskeið í uppnámi

Samkvæmt lögum má ekki veiða hreindýr nema í fylgd leiðsögumanns og enginn má taka að sér leiðsögn nema með leyfi frá Umhverfisstofnun. Námskeið fyrir leiðsögumenn var síðast haldið árið 2011.

Slíkt námskeið var fyrirhugað í febrúar og auglýst pláss fyrir 30 þátttakendur, deilt á veiðisvæðin níu, en 100 manns sóttu um.

Við val á námskeiðið átti samkvæmt auglýsingu að horfa til nokkurra þátta; þörf eftir nýjum leiðsögumönnum á ákveðin veiðisvæði, veiðireynslu umsækjenda og meðmæla frá starfandi leiðsögumönnum.

Deilur hafa verið um þessa tilhögun og heimild Umhverfisstofnunar til að sía inn á námskeiðið og er það því í biðstöðu uns úr þessu fæst skorið hjá umhverfis-, orku- og loftslagsráðuneytinu.