Sala forstjóra Matís á heimaslátruðu kjöti hefur verið kærð
Frá því var greint í byrjun október að Sveinn Margeirsson, forstjóri Matís, hefði selt lambakjöt af heimaslátruðu á bændamarkaði á Hofsósi 30. september – en slíkt er óheimilt samkvæmt lögum um slátrun og sláturafurðir. Nú hefur Matvælastofnun óskað eftir rannsókn lögreglu á þessari markaðssetningu.
Samkvæmt fyrrgreindum lögum má einungis dreifa og selja kjöt sem hefur verið slátrað í löggiltu sláturhúsi og heilbrigðisskoðað af dýralækni á vegum Matvælastofnunar. Brotið felst því í að sauðfé var tekið til slátrunar utan sláturhúss og afurðirnar af því settar á markað án þess að það hafi verið heilbrigðisskoðað í samræmi við lög.
Sveinn sagði í viðtali við Bændablaðið í byrjun október að tilgangur uppátækisins hafi verið margþættur; í fyrsta lagi hafi Matís látið reyna á hvort hægt væri að slátra heima á bóndabýli við aðstæður í samræmi við tillögur þeirra um fyrirkomulag á svokallaðri örslátrun. Þá vildi Matís benda á mikla þörf fyrir að fram fari heildstætt, vísindalegt áhættumat, við ákvarðanir og áhættustjórnun tengt matvælaöryggi á Íslandi. Einnig að benda á möguleika til að auka verðmætasköpun fyrir bændur og um leið prófa Matarlandslagið.is sem vettvang til að stuðla að beinum viðskiptum á milli bænda og neytenda.
Með uppátækinu hafi einnig falist „óformleg könnun á áhuga neytenda á lambakjöti sem slátrað er hjá bónda. „Þó ekki sé hægt að segja að um eiginlega markaðsrannsókn sé að ræða þori ég að fullyrða, eftir viðtökur þeirra sem komu á matarmarkaðinn í gær [sunnudag], að það er mikill áhugi á því að kaupa örslátrað kjöt beint af bónda,“ sagði Sveinn í viðtali við Bændablaðið.
