Reidmenn.com - nýr kennsluvefur í bígerð
Reidmenn.com er verkefni sem unnið er hörðum höndum að því að klára þessa dagana, um er að ræða kennsluvef fyrir hestamenn sem hefur verið í vinnslu nú í töluvert langan tíma en nú líður að útgáfudegi.
Söfnunarátaki hefur verið sett af stað á karolinafund.com til að standa undir vinnslu verksins sem er gríðarlega umfangsmikið. Styrktaraðilar fá aðgang að vefnum á kynningartilboði fyrir sinn styrk og verða fyrstu notendur síðunnar.
Aðstandendur verkefnisins eru þakklátir fyrir öll framlög sem berast og hvert og eitt færir það nær takmarkinu og eykur líkur á að hægt verði að útfæra ný verkefni til birtingar á vefnum.
Uppbygging efnisins sem er eftir Reyni Aðalsteinsson, hefur verið grunnur að námsbrautinni Reiðmanninum við Landbúnaðarháskólann á Hvanneyri síðan sú deild var stofnuð og til viðbótar við texta hefur nú verið bætt við ljósmyndum og kennslumyndböndum.
Vefurinn verður áskriftarvefur og efni hans er stigskipt og á honum munu allir geta fundið efni við sitt hæfi, hvort sem er byrjendur eða lengra komnir.
Það er síðan hugur til að stækka og efla vefinn með nýju efni þegar fram líða stundir og eru nú þegar nokkrar nýjar hugmyndir komnar í vinnslu sem verða vonandi framtíðarverkefni ef vefurinn heldur áfram að ganga vel.
Það er ósk aðstandenda Reiðmanna að biðja ykkur að styðja við átakið, styrkja það og deila póstum og fréttum svo að sem flestir heyri um vefinn og viti hvað hann kemur til með að geta gert svo hann megi verða öflugt verkfæri fyrir reiðkennara og hestamenn.
Hér að neðan eru hlekkirnir aftur á síðurnar þar sem hægt er að fylgjast með framganginum, á facebook síðunni, Reiðmenn, er hægt að sjá búta og sýnishorn af efni sem er verið að útbúa fyrir vefinn.
https://www.karolinafund.com/project/view/909
