Rangur ljósabúnaður á nýjum bílum

Margir nýir bílar eru með ljósabúnað sem er samkvæmt íslenskum lögum og reglugerðum þannig að þeir ættu ekki að fá skoðun. Ekki bara mér heldur mörgum öðrum er ómögulegt að skilja af hverju bílar fá skoðun án þess að vera með réttan ljósabúnað. 

 

Í íslenskum lögum á að vera með ljós allan sólahringinn allt árið um kring og fyrir nokkrum árum fékkst ekki fullnaðarskoðun nema að bílar væru útbúnir dagljósabúnaði. Í spjalli við flutningabílstjóra sem keyrði norður í land fyrir nokkru sagði hann við mig að það hefði komið fyrir sig oftar en einu sinni í vetur þegar veðuraðstæður voru þannig á heiðum að það var lágskafrenningur sem náði í um eins metra hæð og ljóslausir smábílar að aftan sem voru fyrir framan hann hefðu verið í hættu. Þessir bílar keyrðu hægar en umferðin var í skafrenningnum og sáust mjög seint þarna í skafrenningnum. Í flestum tilfellum voru þetta nýlegir bílar og ef hann benti ökumönnum bílanna á hættuna sem þeir skapa með ljósleysinu sögðust flestir ekki hafa vitað af því að þeir væru ljóslausir að aftan.

 

Mismundandi afsakanir

 

Fyrir nokkru var frétt á einum netmiðli sem var nokkurn veginn orðrétt svona:

„Lögreglumenn á Hvolsvelli stöðvuðu ökumann sem var að flytja möl eftir hringveginum á dráttarvél og vagni. Við skoðun reyndust hvorki vél né vagn á nokkurn hátt hæf til aksturs eða flutninga. Dráttarvélin reyndist ótryggð og stýris- og ljósabúnaður hennar í ólagi. Vagninn var ofhlaðinn, óskráður og hjólbarðar of slitnir, einn alveg inn í striga“. 

 

Svona hegðun er engum boðleg og eflaust hefur verið erfitt fyrir ökumann dráttarvélarinnar að afsaka allan þann fjölda af aðfinnslum lögreglunnar. Þegar maður keyrir ökutæki á maður að vita hvort það sé með ljós að aftan eða ekki og ef maður er í vafa er ekkert annað en að setja ökutækið í gang og gá sjálfur, annað er ábyrgðarleysi.

 

Óþarfa sektir fyrir trassaskap er eitthvað til að skammast sín fyrir

 

Perur á að fara yfir reglulega á ökutækjum sem eru í umferð. Það er ekki bara fyrir mann sjálfan að ljósin þurfa að vera í lagi heldur líka aðra í umferðinni. Að vera sjáanlegur í umferðinni getur skipt á milli lífs og dauða. Í sumum lögregluumdæmum eru lögreglumenn duglegri að stöðva fyrir brot á umferðarreglum og fyrir nokkru var vinur minn sektaður fyrir að vera ljóslaus að aftan á bílnum sínum. Þegar ég spurði hann hvort það væri lögreglunni að kenna vildi hann meina það, en eftir smá spjall náði ég honum inn á það að sökin væri hans fyrir að hafa ekki skoðað hvort hann væri löglegur í umferðinni og lokasetning félagans var „ég verð víst að taka á mig sökina og skammast mín“.