Ótti við fuglaflensu eykst

Ótti við fuglainflúensu hefur aukist á ný eftir að tveir menn létu lífið í Hong Kong í desember. Dauðsföllin eru rakin til nýs afbrigðis af fuglaflensu, en báðir mennirnir voru nýkomnir úr ferð til meginlands Kína. Tveir menn létust úr fuglainflúensu í Kína í fyrra.

Fréttir bárust svo á miðvikudag í síðustu viku um þriðja dauðsfallið. Þar var um að ræða 75 ára karlmann sem nýkominn var úr ferð til til borgarinnar Shenzhen.
Á mánudag í síðustu viku töldu menn sig hafa fundið H7N9 veiru í alífuglum sem komnir voru frá Kína á Cheung Sha Wan markaðnum, að því er greint var frá í South China Morning Post. Ekki mun þó vera hægt að sannreyna að um þessa veiru sé að ræða fyrr en eftir ræktun í 21 dag.

Yfirvöld í Hong Kong vildu þó ekki taka neina áhættu og létu samstundis farga 290.000 kjúklingum. Leung Chun-ying borgarstjóri í Hong Kong benti á hættuna af útbreiðslu veirunnar þar sem hefð væri fyrir því að kaupa lifandi kjúklinga á markaðnum svo fólk gæti slátrað honum heima til að fá kjötið sem ferskast. Mikil neysla er alla jafna á þessum tíma en nýtt ár gekk í garð samkvæmt kínversku almanaki á föstudag í síðustu viku.

Kaupmenn á markaðnum voru þó allt annað en hrifnir af förgun þessara kjúklinga. Einn þeirra sagði að bíða hefði átt eftir rannsóknarniðurstöðum. Hann reiknaði með að tapa um fimm milljónum Hong Kong dollara vegna þessarar ákvörðunar yfirvalda.

Í kjölfar nýjasta andlátsins var Cheung Sha Wan heildsölu­markaðnum lokað í 21 dag eða þar til staðfesting fæst á því hvort um H7N9 veiruna sé að ræða.

Fram til þessa hefur verið staðfesta að 110 manns í Kína hafi smitast af H7N9 veirunni og þar af hafi 22 látist samkvæmt fréttastofu AFP. Yfirvöld í Hong Kong segja hins vegar að tilfellin séu fleiri, eða 254 frá því í febrúar 2013. Hefur það vakið ótta um að veiran kunni að stökkbreytast, þannig að hún smitist auðveldlega milli manna.