Nýr formaður kjörinn
Hjörtur Bergmann Jónsson var kjörinn formaður deildar skógarbænda á fundi deildarinnar í liðinni viku. Jóhann Gísli Jóhannsson hefur stigið til hliðar eftir næstum ellefu ára formennsku.
Hjörtur segir nýtt hlutverk leggjast vel í sig og reiknar hann með að þetta verði spennandi og skemmtilegt. Hann hafi þó tekið sér nokkurra vikna umhugsunarfrest áður en hann gaf kost á sér í embættið.
Aðspurður um brýnustu verkefnin hjá deild skógarbænda, svarar Hjörtur því að afurðamál ásamt kolefnisbindingu nýrri og eldri skóga séu ofarlega á blaði. Þá þurfi að efla félagsstarf og samvinnu milli deildar skógarbænda og landshlutafélaganna ásamt því að auka samstarf við félög og stofnanir sem komi að skógrækt og landgræðslu. Hjörtur telur mikilvægt að fjölga þeim skógarbændum sem séu félagsmenn í Bændasamtökum Íslands til að gefa þeim meiri slagkraft innan samtakanna. Nú fái skógarbændur einungis að senda tvo fulltrúa á Búnaðarþing. Allar búgreinar þurfi að vinna saman að framgangi landbúnaðarins, hvort sem það séu skógarbændur, sauðfjárbændur eða aðrir. Þótt sjónarmið séu mismunandi milli búgreina þýði ekki að þær geti ekki fundið leiðir til að mætast á miðri leið.
„Við þurfum að finna einhvern sameiginlegna flöt þar sem við getum unnið saman að góðum málum og það hefst með samtali.“ Hjörtur er kvæntur Hrönn Guðmundsdóttur, sem var framkvæmdastjóri Landssambands skógareigenda (LSE) um árabil og hefur verið virk í félagsstarfi sinnar búgreinar. LSE sameinaðist Bændasamtökum Íslands árið 2021 og nefnist nú deild skógarbænda.
Saman hafa þau ræktað skóg úr landi Lækjar í Ölfusi frá því í kringum aldamótin.
